«Чирчиқ» кимё-индустриал технопаркида 23 март куни бош вазир Абдулла Арипов иштирокида Тошкент шаҳар ҳокимлиги ва Татаристон республикаси ҳукумати ўртасида ҳамкорлик юзасидан «йўл харита»си имзоланди. Бу ҳақда шаҳар ҳокимлиги ахборот хизмати хабар қилди.
Қайд этилишича, Тошкент шаҳар ҳокими Жаҳонгир Ортиқхўжаев ва Татаристон президенти Рустам Минниханов 2022—2023 йилларда Тошкент шаҳар ҳокимлиги ва Татаристон ҳукумати ўртасида кенгайтирилган ҳамкорлик бўйича «йўл харита»сига имзо чеккан.
Ҳужжатга мувофиқ, ҳар икки ҳудудда савдо-иқтисодий фаолият, шаҳарсозлик, муниципал бошқарув, транспорт, уй-жой коммунал хўжалиги, ободонлаштириш ва ижтимоий соҳаларда ўзаро тажриба алмашинуви, шунингдек, маданият, ёшлар, илм-фан, таълим, туризм, спорт, ахборот технологиялари каби қатор соҳаларда ҳамкорлик қилиш масалалари кўзда тутилган.
Эслатиб ўтамиз, 22 март куни кечқурун Татаристон президенти Рустам Минниханов ишчи ташриф билан Ўзбекистонга келган. Тошкент халқаро аэропортида уни Россиянинг Ўзбекистондаги элчиси Олег Малгинов ва Ўзбекистон бош вазир ўринбосари — инвестициялар ва ташқи савдо вазири Сардор Умурзоқов кутиб олган.
23 март куни Минниханов Ўзбекистон ҳукуматининг қатор вакиллари билан музокаралар ўтказиши керак. Минниханов мамлакатга ташрифи давомида Татаристоннинг «Химград» технополиси билан ҳамкорликда «Чирчиқ» кимё-индустриал технопаркини ташкил этилиши муносабати билан ўтказилаётган маросимда бош вазир Абдулла Арипов билан қурилишга тамал тошини қўйди.
Изоҳ (0)