«Рамазон ойида Умра нархи ошади» — Мусулмонлар идораси

Рамазон ойида Умра зиёрати учун қилинадиган тўлов нархлари ошади. Бу ҳақда Ўзбекистон Мусулмонлари идораси халқаро алоқалар бўлими мудири Шавкат Ҳамдамов YouTube’даги «Muslim.uz» каналига маълум қилди.

У рамазон ойи Умраси учун тайёргарлик масалаларига тўхталиб, нархларда ўзгариш бўлишини билдирган:

«Айтишимиз керак, нархлар рамазон ойи учун ошади. Ҳозир зиёратчиларимиз 17 миллион 790 минг сўм бир марталик тўлов қиляпти. Рамазонда нархлар ошиб, мавсуми тугаши билан яна аввалги нархга қайтади. Идорамиз берган маълумот нотўғри қилинган, «энди умра нархи ошмайди», деган гаплар тарқалган. Рамазонда нархлар ошади. Бу Мусулмонлар идораси томонидан кўрилган чора-тадбир эмас, бевосита Саудия Арабистони томонидан амалга оширилди», — деган у.

Аввалроқ Ўзбекистонда Умра зиёрати қачондан бошланиши ва унинг нархлари ҳақида маълумот берилганди. Унда 2020 йил февраль ойига қадар Умра зиёрати учун охирги белгиланган тўловларни амалга оширганлар қўшимча равишда 4 770 000 сўм маблағ тўлаши ҳам келтириб ўтилган эди. Ижтимоий тармоқларда ушбу қўшимча тўлов борасида турли мулоҳазалар билдирилганидан сўнг, Мусулмонлар идораси ҳолатга изоҳ бериб, коронавирус пандемияси Умра хизматлари кўрсатишга ҳам салбий таъсир кўрсатганини маълум қилди. Қайд этилишича, меҳмонхонада 4 кишилик хонага 2 нафар зиёратчи, 50 ўриндиқли автобусга 25 киши жойлаштириш каби талаблар ўрнатилган. 22 январь куни эрта тонгда Умра—2022 мавсумининг илк зиёратчилари Тошкент халқаро аэропортидан Саудия Арабистонига жўнаб кетганди.

Кейинчалик Мусулмонлар идораси Саудия Арабистони ҳукумати томонидан барча йирик мусулмон мамлакатларга Умра зиёратини ташкил этишга рухсат берилиши ортидан подшоҳликдаги барча хизматларга талаб ошганини билдирганди. Бу ўз навбатида бу ўзбекистонлик зиёратчилар учун Рамазон ойида ташкил этиладиган Умра тадбирлари нарх-навосига ҳам таъсир кўрсатган. Шу сабаб ўзбекистонлик зиёратчилар учун Умра нархи оширилади.