“Chirchiq” kimyo-industrial texnoparkida 23-mart kuni bosh vazir Abdulla Aripov ishtirokida Toshkent shahar hokimligi va Tatariston respublikasi hukumati o‘rtasida hamkorlik yuzasidan “yo‘l xarita”si imzolandi. Bu haqda shahar hokimligi axborot xizmati xabar qildi.
Qayd etilishicha, Toshkent shahar hokimi Jahongir Ortiqxo‘jayev va Tatariston prezidenti Rustam Minnixanov 2022—2023-yillarda Toshkent shahar hokimligi va Tatariston hukumati o‘rtasida kengaytirilgan hamkorlik bo‘yicha “yo‘l xarita”siga imzo chekkan.
Hujjatga muvofiq, har ikki hududda savdo-iqtisodiy faoliyat, shaharsozlik, munitsipal boshqaruv, transport, uy-joy kommunal xo‘jaligi, obodonlashtirish va ijtimoiy sohalarda o‘zaro tajriba almashinuvi, shuningdek, madaniyat, yoshlar, ilm-fan, ta’lim, turizm, sport, axborot texnologiyalari kabi qator sohalarda hamkorlik qilish masalalari ko‘zda tutilgan.
Eslatib o‘tamiz, 22-mart kuni kechqurun Tatariston prezidenti Rustam Minnixanov ishchi tashrif bilan O‘zbekistonga kelgan. Toshkent xalqaro aeroportida uni Rossiyaning O‘zbekistondagi elchisi Oleg Malginov va O‘zbekiston bosh vazir o‘rinbosari — investitsiyalar va tashqi savdo vaziri Sardor Umurzoqov kutib olgan.
23-mart kuni Minnixanov O‘zbekiston hukumatining qator vakillari bilan muzokaralar o‘tkazishi kerak. Minnixanov mamlakatga tashrifi davomida Tataristonning “Ximgrad” texnopolisi bilan hamkorlikda “Chirchiq” kimyo-industrial texnoparkini tashkil etilishi munosabati bilan o‘tkazilayotgan marosimda bosh vazir Abdulla Aripov bilan qurilishga tamal toshini qo‘ydi.
Izoh (0)