Қосим-Жўмарт Тўқаев Қозоғистонни кенг кўламли ислоҳотлар кутаётганини маълум қилди

Қозоғистон президенти Қосим-Жўмарт Тўқаев Наврўз муносабати билан Олмаотада ўтказилган байрам тадбирида мамлакатни кенг кўламли ислоҳотлар кутаётганини маълум қилди, деб хабар беради «ТАСС».

«Олдинда бизни кенг кўламли ислоҳотлар, янги Қозоғистонни қуриш кутиб турибди. Сизлар билан, ёшлар билан биргаликда биз, албатта, янги мамлакатни, янги Қозоғистон, иккинчи республикани қурамиз ва буни уддалаймиз», — дейди у. Президентнинг чиқиши республика телеканалларида тўғридан-тўғри эфирга узатилган.

Давлат раҳбари январь ойидаги тартибсизликларда босқинчи ва террорчиларнинг асосий зарбаси Олмаотага тўғри келгани, кўплаб бегуноҳ инсонлар ҳалок бўлгани ва жабрлангани, шаҳар инфратузилмасига улкан зарар етказилганини эслатиб ўтган. «Олмаоталиклар, давлатчилигимиз учун мисли кўрилмаган таҳдид қаршисида қўрқмаганингиз учун сизлардан миннатдорман. Оғир дамда бирлашдингиз, бутун мамлакат сизлар билан бўлди. Халқимизнинг бирдамлиги ва ҳамжиҳатлиги шарофати билан ушбу оғир синовни енгиб ўтдик», — дейди Тўқаев.

Қозоғистон президенти Қосим-Жўмарт Тўқаев январь ойида мамлакатнинг қатор вилоятларида содир бўлган оммавий тартибсизликларга баҳо бериб, «мақсад олий раҳбариятни алмаштириш бўлгани»ни таъкидлаганди.

Эслатиб ўтамиз, Қозоғистонда 2 январь куни газ нархи кескин ошиши сабабли оммавий норозилик намойишлари бошланиб, бир неча кундан сўнг улар тартибсизликларга айланганди. 4 ва 5 январь кунлари Олмаотада намойишчиларнинг хавфсизлик ходимлари билан тўқнашуви кузатилган.

Мамлакатдаги кескинлик муносабати билан Тўқаев КХШТ (Коллектив хавфсизлик шартномаси ташкилоти)га мурожаат қилиб, ёрдам сўради. Ташкилот чекланган муддатга республикага тинчликпарвар контингент юборганди. Шунингдек, Тўқаев тартибсизликлар сабабларини ўрганувчи, айбдорларни аниқловчи ва жавобгарликка тортувчи тергов гуруҳини тузишни буюрган. Давлат раҳбарининг сўзларига кўра, тартибсизликлар иштирокчилари хорижда малака оширган.

Қозоғистон Ички ишлар вазирлигининг хабар беришича, махсус операциялар давомида 4000 нафарга яқин террорчи ҳибсга олинган,  26 нафар «қуролли жиноятчи» ўлдирилган, яна 18 нафари ярадор қилинган. Қозоғистон Бош прокуратураси оммавий тартибсизликлар, шунингдек, террорчилик актларини содир этиш бўйича тергов доирасида жиноий иш қўзғатди.