АҚШ Анқара Украинага Россиядан харид қилинган C-400 ракетага қарши мудофаа тизимларини бериши учун Туркия билан музокаралар ўтказмоқда. Буни Пентагон вакили Sky News Arabia телеканалига тасдиқлаган.
Ҳарбий идора вакилининг сўзларига кўра, Анқарага C-400 дан воз кечиш ва уларни Украинага юбориш таклиф қилинмоқда. Бунинг эвазига Туркиядан Америка санкциялар олиб ташланади ва у F-35 қирувчи самолётларни ишлаб чиқариш дастурига қайтиши мумкин бўлади.
Reuters агентлиги манбасининг маълум қилишича, Туркия Москва билан муносабатларни бузишни хоҳламаслиги сабаб, бу каби келишувга кўнмаслиги мумкин.
Туркия 2017 йилда Россиядан 2,5 миллиард доллар эвазига C-400 тизимларини сотиб олишини эълон қилган ва уларнинг биринчи партияси орадан икки йил ўтгач етказиб берилган эди. НАТОга аъзо давлатнинг бу каби қарори АҚШ томонидан кескин қораланган эди — Анқарага қарши санкциялар жорий этилди, шунингдек, Вашингтон Туркияни F-35 қирувчи самолётларини ишлаб чиқариш дастуридан чиқариб юборди.
Изоҳ (0)