АҚШ Россияга қарши иқтисодий санкцияларини янада кенгайтиради. Бу ҳақда Оқ уйнинг Миллий иқтисодий кенгаш директори ўринбосари Далип Сингх CBS’га берган интервьюсида маълум қилди.
«Биз ўз санкцияларимизни кенгайтиришимиз мумкин. Аллақачон киритган чора-тадбирлар, санкцияларимиз уларнинг таъсирини янада кенгайтириб, кўпроқ мақсадларни қамраб олади. Уларни янаям кўпроқ секторларга қўллаймиз», — дейди Сингх.
Унинг аниқлик киритишича, бу масалан, санкциялар рўйхатига кўпроқ банклар киритилишини англатади. Сингхнинг қўшимча қилишича, янги чекловлар жорий этилса, Россиянинг асосий иқтисодий секторига, хусусан, нефть ва газ тармоғига таъсир кўрсатади.
АҚШ Россияга қарши қатор санкциялар пакетларини киритган. «ВТБ» ва унинг 20 та шўъбаси, «Откритие», «Совкомбанк» ва «Новикомбанк» энг қаттиқ блокировка қилувчи санкциялар остида қолди. Уларнинг Америка юрисдиксиясидаги активлари ва АҚШ долларидаги ҳисоблари блокланган. «Сбербанк» ва унинг 25 та шўъба ташкилоти ҳам санкцияларга учраган.
Бундан ташқари, Россияга мудофаа, аэрокосмик ва кемасозлик саноати учун ярим ўтказгичлар, компьютерлар, лазерлар, ахборот хавфсизлиги ускуналари ва сенсорлар экспортига ҳам чекловлар киритилган. Россиядан импорт қилинадиган айрим товарлар, жумладан, денгиз маҳсулотлари, ароқ, бриллиантлар ҳам санкцияга учраган. Вашингтон Россияга автомобиллар, кийим-кечак, заргарлик буюмларини олиб киришни тақиқлаган.
Шунингдек, Россия мудофаа вазири Сергей Шойгу, ташқи ишлар вазири Сергей Лавров ва Бош штаб бошлиғи Валерий Герасимовга қарши ҳам чекловлар жорий этилган. Бундан ташқари, АҚШ Давлат департаменти Сергей Шойгу ва Валерий Герасимовга қарши ўз санкцияларини ҳам жорий этган. Давлат департаменти уларни «Украинага нисбатан янги босқинда» жавобгар деб ҳисоблайди. Давлат департаменти йўналиши бўйича санкциялар уларнинг АҚШга киришини тақиқлайди.
Изоҳ (0)