Тошкент вилояти Чирчиқ шаҳрида 700 миллион сўм кредит олиб бериш эвазига 20 миллион пора олган сохта банк ходими қўлга олинди. Бу ҳақда вилоят Ички ишлар бош бошқармаси хабар қилди.
Маълум бўлишича, Чирчиқ шаҳрида яшовчи Х.М. (аёл)га ўзини тижорат банк ходими М. деб таништирган шахс юқори лавозимда ишловчи танишлари орқали 700 миллион сўм миқдордаги ипотека кредитини ҳеч қандай ортиқча муаммоларсиз расмийлаштириб беришни ваъда қилган. Эвазига 32 миллион сўм миқдордаги пулни пора тариқасида талаб қилиб келган.
Аризага асосан Тошкент вилояти ИИББ ходимлари томонидан тезкор тадбир ўтказилган. Унда М. исмли шахс ариза муаллифидан келишилган пулнинг 20 миллион сўмини олаётган вақтида холислар иштирокида ушланган.
Тадбир давомида у 1996 йилда туғилган, Чирчиқ шаҳридаги автокорхона ҳайдовчиси бўлиб ишловчи М.С. экани (банк ходими эмас) ва 2018 йил фирибгарлик жинояти билан судлангани аниқланган.
Ҳолат юзасидан унга нисбатан Жиноят кодексининг 168-моддаси 3-қисми (фирибгарлик) ва 28,211-моддаси (пора бериш) билан жиноят ишини қўзғатилган. Ҳозирда тергов ҳаракатлари олиб борилмоқда.
Изоҳ (0)