Toshkent viloyati Chirchiq shahrida 700 million so‘m kredit olib berish evaziga 20 million pora olgan soxta bank xodimi qo‘lga olindi. Bu haqda viloyat Ichki ishlar bosh boshqarmasi xabar qildi.
Ma’lum bo‘lishicha, Chirchiq shahrida yashovchi X.M. (ayol)ga o‘zini tijorat bank xodimi M. deb tanishtirgan shaxs yuqori lavozimda ishlovchi tanishlari orqali 700 million so‘m miqdordagi ipoteka kreditini hech qanday ortiqcha muammolarsiz rasmiylashtirib berishni va’da qilgan. Evaziga 32 million so‘m miqdordagi pulni pora tariqasida talab qilib kelgan.
Arizaga asosan Toshkent viloyati IIBB xodimlari tomonidan tezkor tadbir o‘tkazilgan. Unda M. ismli shaxs ariza muallifidan kelishilgan pulning 20 million so‘mini olayotgan vaqtida xolislar ishtirokida ushlangan.
Tadbir davomida u 1996-yilda tug‘ilgan, Chirchiq shahridagi avtokorxona haydovchisi bo‘lib ishlovchi M.S. ekani (bank xodimi emas) va 2018-yil firibgarlik jinoyati bilan sudlangani aniqlangan.
Holat yuzasidan unga nisbatan Jinoyat kodeksining 168-moddasi 3-qismi (firibgarlik) va 28,211-moddasi (pora berish) bilan jinoyat ishini qo‘zg‘atilgan. Hozirda tergov harakatlari olib borilmoqda.
Izoh (0)