2022 йилнинг май ойигача Тошкент автобуслари кондуктор иштирокисиз нақд тўловни онлайн қайд қилиш тизими билан жиҳозланади.
Маълум қилинишича, мазкур тизимнинг жорий қилиниши ҳайдовчиларга «нақд бўйича режа»нинг бажарилиш талабини бекор қилиш имонини беради. «Подробно» нашрининг ёзишича, лойиҳа билан АТТО оператори шуғулланмоқда.
«Бугунги кунда йўловчиларнинг 60 фоизи транспорт карталари ва онлайн тўловлардан фойдаланади, 40 фоизи эса нақд пул билан тўлашни афзал кўради. Шу муносабат билан ҳайдовчилар учун режа мавжуд. Нақд тўловларни онлайн қайд этишни таъминлайдиган тизимнинг жорий қилиниши бу талабни бартараф этади», — дейди Тошкент транспорт бошқармаси бошлиғи Анвар Жўраев пойтахт ҳокимлигида бўлиб ўтган матбуот анжумани давомида.
Таъкидланишича, хизмат кўрсатиш сифатидан келиб чиққан ҳолда жамоат транспортини молиялаштиришнинг янги тизимига ўтиш президент қарори билан кўзда тутилган.
«Бугунги кунда пойтахт автобуслари ҳайдовчиларининг маоши икки омил — рейсларнинг мунтазамлиги ва даромад режасини амалга оширишга боғлиқ. Режадан халос бўлгач, ҳайдовчилар ўз вақтида бекатга боришлари керак бўлади холос», — дейилади хабарда.
Эслатиб ўтамиз, Тошкент шаҳар жамоат транспорти — автобус ва метрополитен йўналишларида автоматлаштирилган тўлов тизимини жорий этиш ишлари 2021 йил 1 январдан бошланган. АТТО оператори томонидан тақдим этилган имтиёзли (талаба, ижтимоий, ўқувчи) транспорт карталари эса 2021 йил 1 январдан бошлаб амалга киритилди. 2021 йилнинг ноябрида Тошкентдаги барча «маршрутка»лар транспорт карталаридан фойдаланишга ўтиши маълум бўлганди.
Изоҳ (0)