Фарғона вилояти Қўқон шаҳар «Ҳазрати Аббос» масжиди имом-хатиби Саидкамолхон Маҳмудов ва унинг 4 нафар оила аъзоси ис газидан вафот этди. Бу ҳақда Мусулмонлар идораси Фарғона вилояти вакиллиги хабар қилди.
Қайд этилишича, 21 март куни Саидкамолхон Маҳмудов ўзи, турмуш ўртоғи ва уч нафар вояга етмаган фарзандлари билан хонадонида ис газидан заҳарланиш оқибатида вафот этган.
Саидкамолхон домла 2014 йилдан буён Қўқон шаҳридаги «Ҳазрати Аббос» масжиди имом-хатиби вазифасида ишлаб келаётганди.
Фавқулодда вазиятлар вазирлигининг маълумот беришича, ушбу хонадон табиий газ билан таъминланган. Марҳумларнинг ўлим сабабини аниқлаш мақсадида судга оид тиббий экспертиза тайинланган. Экспертиза натижалари олингандан сўнг, қўшимча маълумот тақдим этилади.
«Мутахассисларнинг ўрганишларига кўра фуқаролар ис газидан заҳарланиб вафот этганлиги тахмин қилинмоқда. Суриштирув ишлари олиб борилмоқда. Хонадон 18 февраль куни Қўқон ‘Биокийў ФВБ 30-ЁҚҚ ходими Л.Назиралиев томонидан ёнғин хавфсизлиги қоидаларига риоя қилиш юзасидан йўриқномадан ўтказилиб, махсус дафтарга имзо қўйдирилган», — дейилади хабарда.
Эслатиб ўтамиз, 9 февраль ҳолатига кўра, 2022 йил бошидан буён Ўзбекистонда ис гази билан боғлиқ 21 ҳолатда 19 нафар фуқаро заҳарланган ва 36 нафар фуқаро вафот этган
Аввалроқ Самарқандда тўрт кишининг ис газидан заҳарланиб вафот этгани юзасидан жиноят иши қўзғатилгани, Хоразмдаги чойхонада бир оиланинг уч аъзоси ис газидан заҳарланиб вафот этгани, Каттақўрғонда ис газидан оилавий заҳарланиш оқибатида уч нафар бола ҳалок бўлгани тўғрисида хабар берилганди.
Изоҳ (0)