НАТО Россияни бурчакка ҳайдамоқда, санкциялар эса муаммоларни ҳал қилмайди — Хитой Ташқи ишлар вазирлиги

Хитой ташқи ишлар вазири ўринбосари Лэ Юйчэн Ғарбнинг Россияга қарши санкцияларини «борган сари ғазаблантирадиган» деб атади.

«Тарих санкциялар муаммоларни ҳал қила олмаслигини кўп марта кўрсатди. Санкциялар фақат оддий одамларга зиён етказади ва глобал иқтисодиётни ёмонлаштиради», — деди у.

Лэ Юйчэн, шунингдек, НАТО шарқ томон кенгайиб, Россия каби ядровий давлатни «бурчакка» ҳайдамаслиги кераклигини айтди.

Ғарб давлатлари Россиянинг Украинага бостириб киришига жавобан Россиянинг жаҳон молиявий секторлар, технологиялар ва бошқалардан фойдаланишини чеклайдиган энг оғир санкцияларни қўллади. Шахсий санкциялар Россиянинг йирик тадбиркорлари ва юқори мартабали амалдорларига, жумладан, президент Владимир Путинга ҳам таъсир кўрсатди.

Хитой Россиянинг Украинага бостириб киришини қораламади; у БМТ Бош ассамблеясининг тегишли резолюциясига овоз беришда бетараф қолди. Норасмий маълумотларга кўра, Украинага бостириб киргандан кейин Россия ҳарбий ёрдам сўраб, Хитойга мурожаат қилган. Кремль бу хабарлар ҳақиқатга тўғри келмаслигини билдирди.

18 март куни АҚШ президенти Жо Байден ва Хитой раҳбари Си Цзиньпин икки соатлик суҳбат ўтказди, унда Байден Сини Россияга моддий ёрдам кўрсатишнинг оқибатлари ҳақида огоҳлантирган. Хитой томонининг таъкидлашича, мамлакат раҳбари Байденга «Украина инқирози — биз кўришни истаган ҳолат эмас» деб айтган.

Аввалроқ Хитой Россиянинг Украинада уруш бошлаш режасини билмаганини, агар хабардор бўлганида унинг олдини олишга уриниб кўрган бўлишини маълум қилганди.