Европа космик агентлиги (EКА) Россиянинг «Роскосмос» давлат корпорацияси билан Марсни тадқиқ қилиш бўйича «ЭкзоМарс» рус-европа қўшма лойиҳасидаги ҳамкорликни тўхтатаётганини маълум қилди. Тегишли баёнот ташкилот сайтида эълон қилинган.
16—17 март кунлари Парижда йиғилган EКА бошқарув кенгаши Украинадаги уруш туфайли «ЭкзоМарс» билан боғлиқ вазиятни баҳолади ва бир овоздан 2022 йилда ишга тушириладиган «ЭкзоМарс» роверининг миссияси бўйича «Роскосмос» билан мавжуд ҳамкорликни давом эттириб бўлмайди, деган қарорга келди, — дейилади баёнотда.Лойиҳа 2022 йилнинг август—сентябрь ойларида Марсга Байконур космодромидан «Протон-М» ракета ташувчиси ёрдамида сайёралараро аппаратни жўнатишни назарда тутган эди. Rover сайёрада ўтмишда ёки ҳозир ҳаёт мавжудлигига далил тўплаши керак эди.
«Роскосмос» матбуот хизмати раҳбари Дмитрий Струговец Европа космик агентлигининг қарорини изоҳлар экан, у «EКАдаги ҳамкасблари Россияга қарши шахсий позициясини коинотни ўрганишнинг универсал мақсадларидан устун қўйганидан афсусда» эканини билдирди.
Ўз навбатида, «Роскосмос» раҳбари Дмитрий Рогозин Россиянинг ўзи Марсга миссия жўнатишини айтди. «Тўғри, бир неча йил йўқотамиз, лекин қўниш модулимизни такрорлаймиз, уни ‘Ангара’ ракета ташувчиси билан таъминлаймиз ва ‘Восточний’ космодромининг янги учириш мажмуасида ушбу тадқиқот экспедициясини ўзимиз ўтказамиз», — деди у.
EКА раҳбари Йозеф Ашбахернинг ҳисоб-китобларига кўра, 2022 йилда старт ойнаси йўқолгани сабабли, Франция ёки АҚШдаги ҳамкорлар билан «ЭкзоМарс» миссиясини Марс юзасига учириш 2026 йилгача амалга ошмайди.
15 март куни Европа Кенгаши Парламент Ассамблеяси (PACE) вакиллари бир овоздан Россияни Европа Кенгашидан чиқаришга чақирганди. 16 март куни Россия Европа Кенгашидан чиқариб юборилди. У мазкур ташкилотга 26 йилдан буён аъзо эди.
Изоҳ (0)