Россия ҳамда Украина делегациялари жами 15 банддан иборат тинчлик келишуви устида биргаликда иш олиб бормоқда, дея хабар қилган музокараларга алоқадор учта манбага таяниб The Financial Times.
Нашрнинг ёзишича, томонлар музокараларда сезиларли натижаларга эришишни бошлаган.
Тахминларга кўра, келишувда Украинанинг НАТО аъзолигига кириш режаларини бекор қилиш ва ўз ҳудудида хориж ҳарбий базалари ҳамда қуролларини жойлаштиришдан воз кечиш кўзда тутилган. Бундан ташқари, Украина бошқа мамлакатлардан хавфсизлик кафолатларини олмоқчи, улар АҚШ, Буюк Британия ва Туркия бўлиши мумкин.
Шунингдек, икки манба келишувда Украинада рус тили ҳимояси масаласи ҳам акс этиши ҳақида гапирган. Украина президентининг офиси маслаҳатчиси Михаил Подоляк FT’га берган интервьюсида рус тили масаласи бошқа ижтимоий муаммолар каби Украина манфаатидан келиб чиққан ҳолда ҳал этилишини билдирган.
Подоляк Россия билан келишув 24 февралда мамлакат ҳудудига бостириб кирган Москва қўшинларининг Украинадан чиқиб кетиши кафолатланишини таъкидлаган. Унинг сўзларига кўра, Қрим, ДХР ва ЛХР масалалари алоҳида муҳокама қилинади.
FТ нашри мақолани эълон қилганидан кейин Подоляк ушбу материалнинг Россия томони қораламаси асосида тайёрланганини айтган.
«Мазкур босқичда тасдиқлашимиз мумкин бўлган ягона ҳаракат бу — ўт очишни тўхтатиш, рус қўшинларининг мамлакатдан чиқиб кетиши ва бир қатор давлатлар томонидан Украина хавфсизлигининг кафолатланиши масалалари бўлади», – деган Подоляк.
Москва ҳам Киев ҳам 16 март куни келишув борасида ижобий ўзгаришлар борлигини билдирган бўлса-да, Украина расмийлари Россия президенти Владимир Путиннинг тинчлик битимига риоя қилишига ишонмаяпти ва Кремль кучни қайта тақсимлаб, яна ҳужумга ўтиши мумкинлигидан хавотирда.
The Financial Times
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)