Ўзбекистонда енгил автомобиллар ишлаб чиқариш 1996 йилда Андижон вилоятида йўлга қўйилган. Асака шаҳрида очилган заводда дастлаб Damas, Tico ва Nexia русумли машиналар дунё юзини кўрган. «Дарё» мухбири Тошкент политехника музейида бўлиб, Ўзбекистонда ишлаб чиқарилган автомобиллар тарихи ҳақида фоторепортаж тайёрлади.
Daewoo Nexia — дастлабки ўзбек енгил автомобилларидан бири
Автомобиль тақдимотида (1996 йил) Ўзбекистоннинг биринчи президенти Ислом Каримов ҳам иштирок этган. Президент олд капотига ўз имзосини қўйган Nexia музейдан Ислом Каримов номидаги музейга олиб кетилгани айтилди. «Дарё» матреиал тайёрлаш мобайнида Nexia-1 ҳозирда айнан қаерда сақланаётганини аниқлай олмади.
Неча йилдирки, Nexia актуаллигини йўқотмай келмоқда. Ички ва ташқи бозорда унга бўлган талаб ҳамон юқори. Янги версиядаги Nexia-2 ни ишлаб чиқариш 2008 йилнинг июнь ойидан бошланган.
Биринчи ўзбек автомобилларидан бири – Daewoo Damas
Damas юқори бўлмаган нархи, юк ва йўловчи ташишга мўлжаллангани билан кўпчиликка маъқул бўлиб келади. Саккиз ўриндиқли машина аввал Daewoo бренди (Damas-1) остида ишлаб чиқарилган, ҳозирда эса Chevrolet бренди остида ишлаб чиқарилмоқда.
Музейда турган Damas-1 конвейрдан чиққан биринчи авто эмас, балки тез ёрдам хизматида ишлатилган автомашина ҳисобланади. У музейга кейинчалик олиб келиб қўйилган. Музей ходимларининг айтишича, биринчи чиққан Damas-1 қаерда сақланаётгани номаълум.
Daewoo Tico — кичик оила учун мўлжалланган тўрт ўринли хетчбек
Автомобиль 1996 йилнинг майида ишлаб чиқарила бошланди. 2003 йилнинг февраль ойида Tico автомобили UzDaewooAuto қўшма корхонасининг конвееридан чиқди. Кейинчалик у янги Matiz модели билан алмашди.
Tico’га ўринбосар — Matiz
Дастлабки Matiz’ни синовдан ўтказиш жараёнида Ислом Каримовнинг шахсан ўзи иштирок этган. Давлат раҳбари Matiz’нинг олд (йўловчи) ўриндиғида ўтириб, автомобиль ҳаракатланишини кузатган. Ишлаб чиқарилган биринчи Matiz’га давлат раҳбари имзо қўйган. Имзолаш жараёнидаги сурат ва ўша машина музейда сақланмоқда. Matiz 2001 йилдан 2017 йилгача ишлаб чиқарилган. У ёқилғи сарфи камлиги ва ихчамлиги учун харидоргир бўлган.
Ўзбекистонда Lacetti ишлаб чиқариш 2003 йилдан йўлга қўйилди
Lacetti кузовининг дизайни машҳур Pininfarina автомобиль ательеси (Италия) меҳнатининг маҳсули экани маълум. Бодомнусха олд чироқлар ва узун равон чизиқлар эътибор тортади. У юқори сифат, қўшимча функциялар ва ажойиб бошқарувни ўзида мужассам этган.
2010 йилдан Chevrolet Spark автомобили ишлаб чиқарила бошланди
Spark русумидаги дастлабки ўзбек автомобилига ҳам президент Ислом Каримов имзо қўйган ва машина музейда сақланмоқда. Spark — GM Uzbekistan конвееридан чиққан еттинчи модель ҳисобланади. Автомобиль турли мамлакатлар етакчи дизайнерлари ижодий ишланмалари ҳосиласи бўлиб, икки қаватли радиатор панжараси, кўзга яққол ташланадиган ташқи кўриниши билан эътиборни тортади. Бундан ташқари, автомобиль ўзининг ихчамлиги ва юқори манёврга эгалиги билан шаҳар кўчаларидаги серқатнов транспорт оқимига бемалол «сингиб» кета олади.
Ўзбекистонда 2013 йилдан Chevrolet Cobalt ишлаб чиқарила бошланди
Автомобиль шинамлик, нафосат ва жўшқинлик сифатларини, дизайн соҳасининг эскирмайдиган, мумтоз анъаналарини ўзида мужассамлаган. Хавфсизликни юқори даражада таъминлаш мақсадида автомобиль мустаҳкам пўлатдан ишланиб, ҳайдовчи ва олд ўриндиқдаги йўловчи учун хавфсизлик ёстиқчалари билан жиҳозланган.
Маълумот учун, Ўзбекистонда 2007 йилда Chevrolet Captiva ва Chevrolet Epica, 2008 йилда Chevrolet Tacuma, 2012 йилдан Chevrolet Malibu, Chevrolet Orlando, 2013 йилда Gentra автомобилларини ишлаб чиқариш йўлга қўйилган. 2016 йилдан Chevrolet Nexia, 2018 йилдан Chevrolet Tracker, 2019 йилдан Chevrolet TrailBlazer, Chevrolet Equinox, Chevrolet Traverse автомобиллари ишлаб чиқарила бошланган.
Ҳозирги пайтда UzAutoMotors АЖ томонидан Chevrolet ва Равон брендлари остида – Spark (R2), Nexia (R3), Cobalt (R4), Lacetti (Gentra), Damas, Labo, Malibu, Tracker, Equinox, Trailblazer, Traverse ва Tahoe каби автомобиль моделлари харидорларга етказиб берилмоқда.
Изоҳ (0)