Қозоғистон президенти Қосим-Жўмарт Тўқаев «суперпрезидентлик бошқарув шаклидан кучли парламентга эга президентлик республикасига» ўтиш кераклигини маълум қилди. Бу ҳақда у 16 март куни Қозоғистон халқига йўллаган мурожаатномасида таъкидлаб ўтди, деб хабар беради «ТАСС».
Мурожаатномада давлат раҳбари қуйидаги ўзгаришларни эълон қилган:
- президентни ваколат муддати давомида партияларга аъзолигини тугатиш мажбурияти;
- давлат раҳбарининг қариндошларига давлат ва давлат иштирокидаги компанияларда юқори лавозимларни эгаллашни тақиқлаш;
- президентни вилоят раҳбарларининг қарорларини бекор қилиш ва уларни лавозимдан олиш ҳуқуқдан маҳрум қилиш;
- парламент юқори палатасидаги президент вакиллари сонини 15 тадан 10 та тушириш;
- партияларни рўйхатга олиш бўйича ташаббус гуруҳи аъзоларининг сонини 20 минг кишидан 5 минг кишига қисқартириш.
2017 йилда Қозоғистоннинг биринчи президенти Нурсултон Назарбоев ҳам президентлик ҳокимиятини чекловчи ислоҳотларни амалга оширган. Танқидчиларнинг таъкидлашича, аслида ислоҳотлар президент ҳокимиятини мустаҳкамлашга хизмат қилган.
Бундан олдин Дариға Назарбоева Қозоғистон Парламенти Мажлисининг депутатлигидан кетгани, Қозоғистонда собиқ мудофаа вазири ҳибсга олингани, Тўқаев Қозоғистон президенти лавозимида икки муддатдан ортиқ қолмасликка ваъда бергани тўғрисида хабар берилганди.
Изоҳ (0)