Россияни тарк этаётган халқаро компанияларда 200 мингга яқин одам ишлайди — Forbes

Россияда фаолиятини тўхтатган ёки буни эълон қилган халқаро компаниялар мамлакатдаги 200 мингга яқин одамни иш билан таъминламоқда. Бу ҳақда Forbes хабар бермоқда.

McDonald’s бизнесни қисман тўхтатганини эълон қилган энг йирик иш берувчи ҳисобланади. Россия бўйлаб McDonald’s овқатланиш тармоғида 62 минг киши ишлайди.

Яна 19 минг россиялик Pepsico’да, 15 минг IKEA’да ва 14,5 минг Yum’да ишлайди. Бу компаниялар ҳам Россиядаги фаолиятини қисман ёки вақтинча тўхтатган. 

Россиянинг яна 502 та дўкони Zara, Pull & Bear, Massimo Dutti, Bershka, Stradivarius, Oysho ва бошқа брендларга эга бўлган Испаниянинг Inditex компанияси қарори билан фаолиятини тўхтатди. Inditex 9000 га яқин ходимга молиявий ёрдам кўрсатишда давом этмоқда.

Ўз фаолиятини тўхтатган автомобиль ишлаб чиқарувчилар орасида энг йирик иш берувчи Volkswagen концерни бўлиб, унда деярли 5,8 минг киши ишлайди. Компанияда ходимлар иш ҳақининг учдан икки қисми ва ижтимоий кафолатлар сақланиб қолган.

Шунингдек, EPAM Systems ҳам Россиядаги фаолиятини вақтинча тўхтатди. EPAM’да 6 мингдан ортиқ одам ишлар эди.