Қозоғистон президенти Қосим-Жўмарт Тўқаев январь ойида мамлакатнинг қатор вилоятларида содир бўлган оммавий тартибсизликларга баҳо берди, деб хабар беради Tengrinews.
Парламент палаталарининг қўшма мажлисида сўзга чиққан давлат раҳбари январь фожиаларига оид айрим тафсилотларни ошкор этган.
«Бир нарсани айта оламан: бу кенг кўламли, батафсил ишлаб чиқилган операция бўлиб, унинг мақсади олий раҳбариятни алмаштириш, уни халқ ва хорижий жамоатчилик олдида обрўсизлантириш эди. Фитначилар ушбу мақсадга эришиш учун ўйланмасдан, олдига Олмаотада — энг катта шаҳримизда тартибсизликни келтириб чиқариш, одамларга қўрқувни сингдириш, уларни воқеалар оқибати ҳалокатлилигига ишонишга мажбурлаш, мамлакатдаги вазиятни беқарорлаштириш вазифаси қўйилган профессионал тайёрланган жангарилардан фойдаланди», — дейди Тўқаев.
16 март куни маҳаллий вақт билан соат 11:00 да президент Қосим-Жўмарт Тўқаевнинг Қозоғистон халқига мурожаатномаси бошланган. У мамлакатдаги давлат телеканаллари орқали тўғридан-тўғри эфирга узатилмоқда.
Январь воқеаларига изоҳ берар экан давлат раҳбари кул ранг парда ортидаги схемаларга ўрганиб қолган одамлар ўз имтиёзларини йўқотишдан қўрқиб, халққа қарши чиққанини таъкидлаган.
Бундан ташқари, президент ҳокимларга партиялар филиалларида лавозим эгаллашни тақиқлаш таклифини берган. Давлат раҳбарининг фикрича, бундай қарорлар кўп қутбли партия тизимини шакллантиради.
Мавзуга доир: Қозоғистонда оммавий тартибсизликлар бўйича жиноий ишга 11 нафар ўзбекистонлик ҳам тортилган
Мамлакатдаги кескинлик муносабати билан Тўқаев КХШТ (Коллектив хавфсизлик шартномаси ташкилоти)га мурожаат қилиб, ёрдам сўради. Ташкилот чекланган муддатга республикага тинчликпарвар контингент юборганди. Шунингдек, Тўқаев тартибсизликлар сабабларини ўрганувчи, айбдорларни аниқловчи ва жавобгарликка тортувчи тергов гуруҳини тузишни буюрган. Давлат раҳбарининг сўзларига кўра, тартибсизликлар иштирокчилари хорижда малака оширган.
Қозоғистон Ички ишлар вазирлигининг хабар беришича, махсус операциялар давомида 4000 нафарга яқин террорчи ҳибсга олинган, 26 нафар «қуролли жиноятчи» ўлдирилган, яна 18 нафари ярадор қилинган. Қозоғистон Бош прокуратураси оммавий тартибсизликлар, шунингдек, террорчилик актларини содир этиш бўйича тергов доирасида жиноий иш қўзғатди.
Изоҳ (0)