ЙҲХХ Қамчиқ довонида қор кўчкиси содир бўлгани ҳақида хабар қилди

Қамчиқ довонида 15 март куни қор кўчкиси содир бўлди, деб хабар бермоқда Йўл ҳаракати хавфсизлиги хизмати.

ЙҲХХ хабарида айтилишича, шу куни соат 12:40 ларда довондан ўтган А-373 автомобиль йўлининг 232—233-километрлари оралиғида қор кўчкиси содир бўлган. Шу сабаб транспорт воситаларининг ҳаракати 15-20 дақиқага вақтинча чекланган. Йўл тўлиқ тозаланиб, машиналар ҳаракати учун рухсат берилган.

«Ўзгидромет» бу хабарга раддия берди. Қайд этилишича, қор кўчкиси содир бўлгани тўғрисида нотўғри ахборот тарқатилган. Мутахассислар вазиятга ойдинлик киритиб, ҳеч қандай кўчки юз бермаганини аниқлаган.

Шунингдек, «Қамчиқавтойўл» унитар корхонаси ҳам довонида қор кўчкиси кузатилмаганини маълум қилди. Автомобиль йўлида соат 12:35 дан 12:45 гача 6 дона BDО-5 тўсиқларни ўрнатиш учун 10 дақиқа муддатга автотранспорт воситалари ҳаракати чекланган. Ўрнатиш ишлари якунлангандан сўнг, ҳаракат тикланган. Ёғингарчилик сабаб йўл хандақларига тушган тоғ жинсларидан тозалаш ишлари бажарилган. Ҳозирги вақтда автотранспорт воситалари икки томонлама ҳаракатланмоқда.

Кейинчалик қор кўчкиси содир бўлгани ҳақидаги хабар Йўл ҳаракати хавфсизлиги хизматининг Telegram’даги каналидан ўчирилди.