Ўзбекистонда Россиянинг яна 7 та университети филиаллари очилиши режалаштирилмоқда

Россия Фан ва олий таълим вазирлиги сайтида «Россия ва Ўзбекистон ўртасидаги ҳамкорлик: Россия университетларининг янги филиаллари, Суффа халқаро радиоастрономия обсерваторияси, қўшма илмий лойиҳалар» номли мақола эълон қилинди, деб хабар беради «Дунё» агентлиги.

Маълумот вазирлик департаменти директори ўринбосари Елена Горожанкина томонидан икки мамлакат ўртасида дипломатик муносабатлар ўрнатилганининг 30 йиллиги арафасида тайёрланган.

«Бугунги кунда Россия ва Ўзбекистон ҳамкорликда кўплаб лойиҳаларни амалга оширмоқда. Энг йирикларидан бири — кенг кўламли астрофизик тадқиқотларни ўтказиш учун мўлжалланган Суффа халқаро радиокосмик обсерваториясини қурилиши доирасида амалга ошириляпти. Бундан ташқари, ўзбекистонлик 48,7 минг талаба Россия ОТМларида таълим олмоқда. Яқин йилларда Россиянинг яна 7 та университети Ўзбекистонда ўз филиалларини очишни режалаштирган», — дейилади мақолади.

Мақолада қайд этилишича, Россиянинг қуйидаги 7 та университети Ўзбекистонда ўз филиалини очишни режалаштирган: Н.I.Пирогов номидаги Россия миллий тадқиқот тиббиёти университети, А.Н.Косигин номидаги Россия давлат университети (Технология. Дизайн. Санъат), Шимолий Кавказ федерал университети, Самарқандда Россия давлат гуманитар университети, Москва давлат геодезия ва картография университети, Перм миллий тадқиқот политехника университети, Москва давлат озиқ-овқат ишлаб чиқариш университети.

Аввалроқ Андижон вилоятида 2022 йилда иккита хусусий олий таълим муассасаси ташкил этилиши тўғрисида хабар берилганди.