Ўзбекистонда март ойи бошларидан буён ёмғирли об-ҳаво давом этмоқда. Ёғингарчилик вилоятлар аҳолиси учун қатор ноқулайликлар туғдиряпти — айрим кўчаларда тўпланиб қолаётган сув ҳайдовчи ва йўловчилар ҳаракатини мураккаблаштираётган бўлса, довон йўлларида ўпирилишлар кузатилмоқда. Айни пайтда Самарқанд шаҳрида сув босган кўча ва уйлардаги тўпланиб қолган сувларни махсус хизмат ходимлари насослар орқали тортиб чиқармоқда. Бу ҳақда шаҳар ҳокимлиги матбуот хизмати хабар берди.
Тошкент вилояти ҳокимлигининг маълум қилишича, аҳолидан келиб тушаётган мурожаатлар асосида қутқарувчилар томонидан махсус техникалар ёрдамида маҳалла кўчаларига, ариқларга ҳамда аҳоли ҳовлиларига тўпланиб қолаётган сувларни тортиш ишлари давом этмоқда.
«Шу ўринда вилоят Фавқулодда вазиятлар бошқармаси аҳолидан саросимага тушмасликни, ёғингарчилик туфайли юзага келаётган вазиятларда хушёрлик ва эҳтиёткорликни оширишни сўраб қолади», — дейилади хабарда.
«Ўзгидромет» хабарига кўра, 17—20 март кунлари Ўзбекистон ҳудудига Эрондан илиқ ва нам ҳаво, сўнгра Волгабўйи ҳудудларидан совуқ ҳаво массаси кириб келиши кутилмоқда. Кучли ёмғирлар сабабли Ўзбекистоннинг 9 та вилоятида сел келиш хавфи эълон қилинган.
Изоҳ (0)