Бухоро шаҳридаги туғуруқ комплексида эгизак фарзандларни дунёга келтирган аёл кучли анафилактик реакция таъсирида вафот этгани айтилди. Бу ҳақда «Дарё»га туғуруқхона бош шифокори Зайнаб Саидова маълум қилди.
Таъкидланишича, Бухоро шаҳридаги «Шайхон» маҳалласида яшовчи 23 ёшли фуқаро С.Ф. 9 март куни туғуруқ комплексига келтирилган. Шу куннинг ўзида эгиз ҳомиланинг биринчиси чаноқ билан келгани, қоғаноқ пардаси туғуруқдан олдин ёрилгани ҳисобга олиниб, кесарча кесиш операцияси бажарилган. Операциядан олдин 2,0 грамм «Цефтриаксон» воситаси синама (проба)дан ўтказилган. Қоғаноқ сувлари кетгани ва туғуруқдан кейинги септик асоратларнинг олдини олиш мақсадида антибактериал терапеяни давом эттириш буюрилган.10 март куни соат 23:00 да беморга тўрт доза антибиотик «Цефтриаксон натрия» қилинган. Беморда кучли анафилактик реакция кузатилган. Бемор ўта оғир аҳволда бўлган, сунъий нафас олдириш аппаратига уланган. Лекин реанимацион чоралар самарасиз кечган ва беморда 11 март куни соат 15:35 да биологик ўлим қайд этилган.
«Антибиотик «Цефтриаксон натрия» — Dentafill plyus масъулияти чекланган жамияти томонидан чиқарилган бўлиб, ушбу воситанинг қўлланиш қоғозидаги манбага кўра, 10122 серияси остида 2021 йилнинг октябрь ойида ишлаб чиқарилгани ва яроқлилик муддати 2024 йилнинг октябрь ойига қадар экани қайд этилган. Восита туғуруқ комплекси ёнидаги ‘Карим мед фарм’ дорихонасидан олинган», — дейди Зайнаб Саидова.
Туғуруқ комплекси бош шифокорининг сўзига кўра, беморга ушбу дори воситаси тўрт маротаба қилинган бўлиб, биринчи ўтказувда синама қўлланган.
Ҳомила операцияси узоқ йиллик тажрибага эга шифокор М.А. томонидан амалга оширилган.
«Шифокорлар ҳеч қачон қасддан инсон ҳаётини хавфга қўймайди. Аллоҳ амри олдида ҳамма ожиз», — дейди вилоят соғликни сақлаш бошқармаси бошлиғи ўринбосари Ихтиёр Абдулҳақов.
Аввалроқ марҳуманинг ўлими сабабларини аниқлаш мақсадида судга оид тиббий экспертизаси тайинлангани, ҳолат юзасидан Бухоро шаҳар прокуратураси томонидан терговга қадар текширув ҳаракатлари олиб борилаётгани хабар берилганди.
Мавзуга доир: Андижондаги туғуруқхонада ёш она ўзини осиб қўйди
Изоҳ (0)