Андижон шаҳридаги Болалар шаҳарчасида тарбияланувчилар қолмагани сабаб фаолияти тугатилган. Бу ҳақда «Дарё» мухбири хабар бермоқда.
Вилоят ҳокими Шуҳрат Абдураҳмоновнинг 2022 йил 14 март кунидаги қарори билан шаҳарчада тарбияланаётган болаларнинг барчаси васийликка, ҳомийликка, оилага ва оилавий болалар уйига жойлаштирилганлиги сабаб вилоят Халқ таълими бошқармасининг 2022 йил 5 февралдаги Андижон шаҳрида жойлашган Болалар шаҳарчаси фаолиятини тугатиш тўғрисидаги хатига розилик берилган. Шаҳарча биноси, асосий воситалари, жиҳозлари ва ускуналари билан тўлиқ ҳолда вилоят Халқ таълими бошқармаси балансига ўтказилган.
Шунингдек, мутасадди идоралар раҳбарларига шаҳарча тугатилиши муносабати билан ушбу муассасада ишловчи ходимларга Меҳнат кодексида белгиланган тартибда огоҳлантириш, кафолат ва компенсациялар берилишини таъминлаш ҳамда уларни ишга жойлаштириш чораларини кўриш топшириғи берилган. Қолаверса, Андижон шаҳрида ташкил этилган 1-, 5-, 6-, Асака туманидаги 2- ва Булоқбоши туманидаги 3-сонли оилавий болалар уйининг харажатлар сметаси ва штатлар жадвалини тегишли тартибда ишлаб чиқиш вазифалари юклатилган.
Етим болалар ва ота-она қарамоғидан маҳрум бўлган болаларни баркамол авлод сифатида шаклланиши ҳамда ижтимоий мослашувини таъминлаш учун зарур шарт-шароитлар яратиш мақсадида Болалар шаҳарчасининг 71 нафар тарбияланувчисидан икки нафари олий таълим ва профессионал таълим муассасаларига ўқишга қабул қилинган. Бир нафари иш билан таъминланган. Қолган 39 нафари туман (шаҳар) ҳокимларининг тегишли қарорлари билан алоҳида оилаларга, 29 нафари олтита оилавий болалар уйига ўтказилган.
Изоҳ (0)