Тошкент вилояти Зангиота туманида имтиёзли кредитни бошқа мақсадларига ишлатиб, талон-торож қилиб юборган иккита МЧЖ раҳбарлари аниқланди, деб хабар беради Бош прокуратура ҳузуридаги департамент.

Маълум қилинишича, департаментнинг Зангиота туман бўлими томонидан терговга қадар текширув ўтказилган. Текширувда «С.» ва «Л.C.» МЧЖ раҳбарлари ўзаро тил бириктириб, тумандаги банк филиалидан енгил типдаги замонавий иссиқхона қуриш мақсадида 5,9 миллиард сўм имтиёзли кредит ажратилишига эришгани аниқланган. Улар маблағнинг 1,2 миллиард сўмини банк биржаси орқали 129,4 минг долларга айирбошлаган, шунингдек, 3,8 миллиард сўмга жияни Н.нинг номига Қибрай туманида янги уй-жой қуриб, жиноий фаолиятдан олинган даромадини легаллаштирган.

Бундан ташқари, банк ходимлари ажратилган кредит маблағини мониторингдан ўтказмагани маълум бўлган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш), 207-моддаси (мансабга совуққонлик билан қараш) ва 243-моддаси (жиноий фаолиятдан олинган даромадларни легаллаштириш) билан жиноят иши қўзғатилиб, тергов ҳаракатлари ўтказилмоқда.

Аввалроқ Тошкентда ўзи ишлайдиган корхонанинг 160 млн сўмдан ортиқ маблағини талон-торож қилган бош ҳисобчи ушлангани, Сирдарё ва Сурхондарёда жами 4 млрд сўм кредит маблағларини талон-торож қилган раҳбарлар қўлга олингани тўғрисида хабар берилганди.