Наврўз байрами муносабати билан йўловчилар учун қўшимча қулайликлар яратиш мақсадида 19—26 март кунлари Тошкент ва Самарқанд шаҳарлараро қўшимча поездлар қатнови амалга оширилади. Бу ҳақда «Ўзбекистон темир йўллари» хабар қилди.
Қайд этилишича, шу кунлари Тошкент—Самарқанд—Тошкент йўналишида юқори тезликда ҳаракатланувчи «Афросиёб» поездлари қўйилади.
Эслатиб ўтамиз, 21—23 март кунларида ички йўналишдаги йўловчи поездлар учун қуйидаги тариф қисмидан киритилган байрам чегирмалар мавжуд:
- нафақахўрлар, ногиронлар, 1941—1945 йил уруш қатнашчилари ва уларга тенглаштирилган фуқароларга чиптанинг тариф қисмидан – 50 фоиз;
- олий ўқув юртларининг талабалари, мактаб ўқувчилари, коллеж ва лицей талабалари, ИИВ, МВ, ДХХ, ДС, ДБ махсус таълим муассасалари талабаларига чиптанинг тариф қисмидан – 15 фоиз;
- оилавий бўлиб поездга чиқса (икки ёки ундан ортиқ киши – эри ва рафиқаси, эри ёки рафиқаси ва 18 ёшгача бўлган фарзандлари, отаси ёки 18 ёшга тўлмаган боласи бўлган она) (никоҳ гувоҳномаси ва қариндошликни белгиловчи ҳужжатлар нусхаси тақдим этилган ҳолда) чиптанинг тариф қисмидан – 15 фоиз;
- бир жамоа, гуруҳ бўлиб поездга чиқса (4 кишидан ортиқ - йўриқнома асосида) чиптанинг тариф қисмидан – 15 фоиз;
- «Афросиёб» тезюрар электропоездларида барча тоифадаги йўловчиларга чиптанинг тариф қисмидан - 10 фоиз.
Аввалроқ Uzbekistan Airways ҳам Наврўз байрами муносабати билан 19 мартдан 23 мартгача амалга ошириладиган маҳаллий авиақатновларнинг барча тарифлари авиачипталарига 50 фоиз чегирма эълон қилганди.
Шунингдек, Мўйноқ тумани ҳокими Бахтияр Менглибеков Наврўз байрами арафасида Тошкент—Нукус—Мўйноқ йўналишида авиапарвоз йўлга қўйиш режалаштирилганини маълум қилганди.
Изоҳ (0)