Ўзбекистон президентининг расмий веб-сайтига ўхшаш сохта ҳаволали сайт яратилди, деб огоҳлантирмоқда Telegram’даги «AntiFake.uz» канали.
Қайд этилишича, ҳаволада «болалалари бор ҳар бир оилага бюджетдан 650 минг сўм пул ажратилиши» ҳақида ёлғон ахборот берилган. Пулни олиш учун фуқаролардан шахсга доир ҳамда пластик карта тўғрисидаги маълумотларни киритиш сўралган.
«Фуқаролардан бу каби сохта сайтларга кирмасликни сўраб, виртуал фирибгарлардан огоҳ бўлишга чақирамиз», — дейилади хабарда.
Маълумот учун, ҳозирда мазкур сохта ҳаволага кириш имконияти мавжуд эмас.
Аввалроқ Соғлиқни сақлаш вазирлигининг расмий веб-сайти билан бир хил дизайнда тайёрланган фейк сайт очилгани, унда турли ёлғон маълумотлар тарқатилаётгани хабар қилинганди. Сохта веб-сайтнинг асосий фонида вакцина олганларга 750 минг сўм миқдорида пул маблағи берилиши айтилган. Бунинг учун шахсий маълумотларни киритиш сўралган.
Шунингдек, ижтимоий тармоқларда Ўзбекистонда янги қонун кучга кириши натижасида энди барча телефон қўнғироқлари ёзиб олиниб, ижтимоий тармоқ ва форумлар назоратга олиниши, доимий кузатувда бўлиши айтилган хабарлар тарқалганди. Ўзбекистондаги сохта ахборотларга раддия берувчи расмий манба «AntiFake.uz» ҳолатга муносабат билдириб, мазкур хабарлар ёлғон ва ҳақиқатга мос келмаслигини, аҳоли ўртасида ёлғон ахборот тарқатганлик учун жавобгарлик мавжуд эканини маълум қилганди.
Изоҳ (0)