Бухорода бир неча йилдан буён буйрак етишмовчилиги ташхиси билан азият чекиб келган 31 ёшли беморга отаси донорлик қилди. Бу ҳақда «Дарё»га Республика шошилинч тиббий ёрдам илмий маркази вилоят филиали ахборот хизмати раҳбари Азамат Каттаев хабар берди.
Таъкидланишича, Республика шошилинч тиббий ёрдам илмий маркази Бухоро филиалида илк бор буйрак трансплантацияси жарроҳлик амалиёти ўтказилган.
«Ташхис терминал босқичга ўтгани сабабли беморни ҳаётга қайтаришнинг ягона усули — бу буйракни кўчириб ўтказиш амалиёти ҳисобланади. Беморга 62 ёшли отаси донор бўлди. Донор уч ой давомида чуқур текширишлардан ўтказилгач, реципиентга буйрак трансплантацияси амалиёти тавсия қилинди. Пойтахтдан ҳам бир гуруҳ трансплантолог мутахассислар таклиф этилди», — дейди филиал директори Тоҳир Мусоев.
Айтилишича, кўчирилган буйрак дастлабки соатларда ўз фаолиятини кутилганидан ҳам қониқарли бошлаган.
«Бемор ота ва боланинг аҳволи айни дамда жуда яхши. Биринчи буйрак трансплантацияси амалиёти бўлгани учунми, яширмайман, юрагимда ишонч билан бирга қўрқув ҳам бўлди. Энг кичик нуқтада ҳам адашишга ҳаққим йўқ. Саккиз соат давом этган амалиёт муваффақиятли ўтди. Операциядан сўнг очиқ ҳавога чиқдим. Ҳўнграб йиғлаб юбордим. Ота-бола ҳаёти сақлаб қолингандан Аллоҳга шукурлар келтирдим», — дейди Тоҳир Мусоев.
Изоҳ (0)