Бухорода юк автомашинаси орқали қўшни давлатдан 5,2 миллиард сўмлик дори воситаларини ноқонуний олиб киришга уринган ҳайдовчи қўлга олинди. Бу ҳақда «Дарё»га вилоят Божхона бошқармаси ахборот хизмати раҳбари Жавоҳир Исмоилов хабар берди.
Таъкидланишича, 2022 йилнинг 11 март куни вилоят Божхона бошқармаси ходимлари томонидан «Олот» чегара божхона постида қўшни давлатдан кириб келаётган юк автомашиналари белгиланган тартибда кўрикдан ўтказилган. Бухоро шаҳрида яшовчи фуқаро З.Р. кўрик давомида ўз бошқарувидаги автомашинаси ва ундаги юкларнинг барча ҳужжатларга мувофиқлигини кўрсатишга ва божхона ходимларни чалғитишга уринган. Ҳайдовчининг саросимада экани назоратчиларни янада шубҳалантирган. Холислар иштирокида божхона кўригидан ўтказилган автомашинада юк кузатув ҳужжатларида кўрсатилмаган ва кўрсатилганидан ортиқча бўлган умумий қиймати 5,2 миллиард сўмлик қимматбаҳо дори воситалари борлиги маълум бўлган. Дори воситалари қўшни давлатларда ишлаб чиқарилгани ва Ўзбекистон ҳудудига ноқонуний олиб кирилаётгани аниқланган.
«Худди шу куни мазкур божхона постига қўшни давлатдан кириб келган иккинчи юк автомашинаси ҳам кўрикдан ўтказилганда унда кузатув ҳужжатларида кўрсатилмаган, умумий қиймати 1,7 миллиард сўмлик алюмин фольгалари товарлари борлиги аниқланди. Ҳозирда ҳар икки ҳолат юзасидан божхона органлари томонидан суриштирув ҳаракатлари давом эттирилмоқда», — дейди Жавоҳир Исмоилов.
Мавзуга доир:
- Тошкент аэропортида 27,3 минг доллар ва 1,8 млн рублни тамаки қутиларига яшириб олиб ўтишга уринган шахс ушланди
- Тошкент вилоятида Тожикистондаги наркокурьер юборган 9 килодан ортиқ гиёҳванд моддани сотиб бермоқчи бўлган шахслар ушланди
- Тошкент аэропортида 300 минг доллардан ортиқ пулни дафтар варақлари орасига яшириб олиб ўтмоқчи бўлган икки киши тўхтатиб қолинди (видео)
Изоҳ (0)