Ташқи ишлар вазири Абдулазиз Комилов 11—13 март кунлари Туркиянинг Анталия шаҳрида ўтказилган иккинчи дипломатик форумда иштирок этди. Бу ҳақда Ташқи ишлар вазирлиги хабар қилди.
Қайд этилишича, «Афғонистон: янги воқеликларни қандай енгиш керак?» мавзусида сўзга чиққан вазир Ўзбекистоннинг қўшни давлатда узоқ муддатли ва барқарор тинчлик ўрнатиш, афғон халқига инсонпарварлик ёрдами кўрсатиш борасидаги саъй-ҳаракатлари ҳақида форум иштирокчиларига маълумот берган.
Вазир форум доирасида Туркиянинг АNews телеканалига берган интервьюсида Украинадаги вазият юзасидан ҳам ўз фикрларини билдириб ўтган.
«Биз жуда хавотирдамиз. Бу ҳақда кўп гапиришимиз мумкин. Аммо дунёдаги аксарият одамлар каби биз ҳам куч ишлатиш тўхтатилишини ва барча муаммолар сиёсий-дипломатик йўллар билан ҳал қилинишини хоҳлаймиз», — деган у.
Эслатиб ўтамиз, Ўзбекистон Украина ва Россия атрофидаги вазият бўйича «вазмин, нейтрал позицияда». «Мамлакатимиз азалдан ҳам Россия, ҳам Украина билан яқин, дўстона муносабатларга эга. Биз кенг минтақамизда тинчлик, барқарорлик ва изчил тараққиёт бўлишидан манфаатдормиз. Барча баҳс ва келишмовчиликлар фақатгина халқаро ҳуқуқ нормалари асосида ҳал қилиниши лозим», — деган президент матбуот котиби Шерзод Асадов Мирзиёев ва Путин ўртасидаги телефон мулоқоти юзасидан маълумот бериб.
Аввалроқ 6—9 март кунлари ташқи ишлар вазири Абдулазиз Комилов бошчилигидаги делегация АҚШга ташриф буюргани хабар қилинганди. Вазирлик раҳбари Вашингтонга ташрифи доирасида АҚШ Давлат котиби Энтони Блинкен билан музокаралар ўтказган. Блинкен «Украина ва Афғонистонга кўрсатаётган инсонпарварлик ёрдами учун» Ўзбекистонга миннатдорчилик билдирган.
Изоҳ (0)