Tashqi ishlar vaziri Abdulaziz Komilov 11—13-mart kunlari Turkiyaning Antaliya shahrida o‘tkazilgan ikkinchi diplomatik forumda ishtirok etdi. Bu haqda Tashqi ishlar vazirligi xabar qildi.
Qayd etilishicha, “Afg‘oniston: yangi voqeliklarni qanday yengish kerak?” mavzusida so‘zga chiqqan vazir O‘zbekistonning qo‘shni davlatda uzoq muddatli va barqaror tinchlik o‘rnatish, afg‘on xalqiga insonparvarlik yordami ko‘rsatish borasidagi sa’y-harakatlari haqida forum ishtirokchilariga ma’lumot bergan.
Vazir forum doirasida Turkiyaning ANews telekanaliga bergan intervyusida Ukrainadagi vaziyat yuzasidan ham o‘z fikrlarini bildirib o‘tgan.
“Biz juda xavotirdamiz. Bu haqda ko‘p gapirishimiz mumkin. Ammo dunyodagi aksariyat odamlar kabi biz ham kuch ishlatish to‘xtatilishini va barcha muammolar siyosiy-diplomatik yo‘llar bilan hal qilinishini xohlaymiz”, — degan u.
Eslatib o‘tamiz, O‘zbekiston Ukraina va Rossiya atrofidagi vaziyat bo‘yicha “vazmin, neytral pozitsiyada”. “Mamlakatimiz azaldan ham Rossiya, ham Ukraina bilan yaqin, do‘stona munosabatlarga ega. Biz keng mintaqamizda tinchlik, barqarorlik va izchil taraqqiyot bo‘lishidan manfaatdormiz. Barcha bahs va kelishmovchiliklar faqatgina xalqaro huquq normalari asosida hal qilinishi lozim”, — degan prezident matbuot kotibi Sherzod Asadov Mirziyoyev va Putin o‘rtasidagi telefon muloqoti yuzasidan ma’lumot berib.
Avvalroq 6—9-mart kunlari tashqi ishlar vaziri Abdulaziz Komilov boshchiligidagi delegatsiya AQShga tashrif buyurgani xabar qilingandi. Vazirlik rahbari Vashingtonga tashrifi doirasida AQSh Davlat kotibi Entoni Blinken bilan muzokaralar o‘tkazgan. Blinken “Ukraina va Afg‘onistonga ko‘rsatayotgan insonparvarlik yordami uchun” O‘zbekistonga minnatdorchilik bildirgan.
Izoh (0)