Навоий вилояти Нувабаҳор туманида 250 грамм радиоактив моддани ноқонуний равишда сотишга уринган шахслар ушланди, деб хабар беради ИИВ ЖҚББ Коррупция ва иқтисодий жиноятларга қарши курашиш бошқармаси.
4 март куни Навоий вилояти ИИБга фуқаро ариза билан мурожаат қилиб, у ўз аризасида Навоий вилояти Навбаҳор туманида яшовчи икки нафар шахс радий радиоактив моддасини 50 минг долларга сотмоқчи эканини маълум қилиб, уларга нисбатан қонуний чора кўришни сўраган.
Мазкур аризага асосан, 5 март куни Навоий вилояти ИИБ ЖҚБ Коррупция ва иқтисодий жиноятларга қарши курашиш бўлими, ДХХ Навоий вилояти бошқармаси ҳамда Навбаҳор тумани ИИБ ходимлари ҳамкорлигида тезкор тадбир ўтказилган. Тадбир давомида туманнинг «Қалқонота» маҳалласида жойлашган «Шукрона» тўйхонаси олдида икки нафар шахс бир дона шиша идишга жойлаштирилган «Радий Ра 226 02 5» ёзувли 250 грамм радиоактив материални махсус харидорга 50 минг долларга сотаётган вақт ашёвий далиллар билан ушланган.
Ҳолат юзасидан 2022 йил 5 март куни Навбаҳор тумани ИИБ ҳузуридаги Тергов бўлинмаси томонидан Жиноят кодексининг 252-моддаси (радиоактив материалларни қонунга хилоф равишда эгаллаш) 2-қисми «б» банди билан жиноят иши қўзғатилган. Жиноят иши юзасидан тергов ҳаракатлари олиб борилмоқда.
Эслатиб ўтамиз, 2021 йилнинг октябрида Хоразмда симоб ва платинани 530 минг долларга сотаётган шахс ушланган эди.
Изоҳ (0)