Fitch, S&P ва Moody’s рейтинг агентликлари Россия кредит рейтингини кескин пасайтирди.
Fitch агентлиги Россиянинг чет эл валютадаги узоқ муддатли дефолт рейтингини олти поғонага, «ВВВ»дан «В»га туширди.
Бу Россияда дефолт хавфи жиддий ва мамлакат заифлиги юқори эканлигини билдиради.
Ғарб мамлакатлари томонидан қўлланган йирик санкциялар туфайли Россиядаги халқаро захираларининг катта қисми «валюта интервенсиялари учун яроқсиз»га айланиши, активларнинг каттагина қисми эса музлатилиши мумкин, — дейилади агентликда.
Moody’s ҳам Россия узоқ муддатли рейтингларини олти поғона пастга – «Bаа3»дан «B3»га тушириб ташлади.
Бу Россиянинг «сармояга лаёқатли» тоифасидан «юқори хавфли» тоифага ўтганини англатади.
Рейтингларнинг бирданига бир неча поғона пастга тушириб юборилиши ва иқтисодиётнинг ёмонлашиши фонида уларни қайта кўриб чиқиш ҳолатида сақланиши Ғарб мамлакатлари томонидан Россияга қўлланган оғир санкциялар туфайли қўзғатилган, — деб ҳисобланади агентликда.
Standard & Poor’s (S&P) Россия рейтингини «ВВ+»дан «ВВВ-» даражагача туширди. Бу Россия рейтингининг «чиқитлигини» билдиради.
АҚШ, Европа Иттифоқи ва Буюк Британия томонидан Россияга қўлланган санкциялар мамлакат иқтисодиётига оғир зарба беради. Санкциялар Россия банк тизимига, айниқса, халқаро савдо-сотиқларнинг воситачилик қисмларига сезиларли таъсир ўтказади, — деб фикр билдиришмоқда агентлик таҳлилчилари.
Бу рейтинглар ўзи нима учун керак?
Fitch, Moody’s ва S&P рейтинг агентликларининг катта учлигига киради.
Дунёда 100 га яқин рейтинг агентликлари мавжуд, аммо айнан мана шу учталик энг йирик ва нуфузли ҳисобланади.
Кредит рейтинги – бу бир рақам ичига киритилган турли кўрсаткичлар тўплами бўлиб, у мамлакатнинг муайян ҳудудидаги вазиятни тавсифлашга мўлжалланган. Рейтинг мамлакат иқтисодиётида содир бўлаётган воқеаларни кўрсатувчи ўзига хос барометрдир.
Сармоядорлар мамлакатга сармоя киритиш ёки киритмаслик тўғрисида қарор қабул қилишда кўплаб омилларга, жумладан, ушбу рейтингларга ҳам эътибор беришади.
Агарда кредит рейтинги паст бўлса, демак, бу мамлакатга сармоя киритиш нотўғри. Юқори рейтинглар, мамлакатнинг маблағлар учун хавфсиз эканлигини билдиради.
Масалан, Ўзбекистон сўнгги йиллардагина мамлакатга сармоя жалб қилишга хизмат қилувчи рейтингларга эга бўла бошлади.