Беларусдаги Беловежск ўрмонида Россия ҳамда Украина делегациялари ўртасидаги музокараларнинг учинчи раунди якунланди. Бу ҳақда Россиянинг Минскдаги элчихонаси ахборотига таяниб, «Интерфакс» хабар берган.
Муҳокамалар ёпиқ эшиклар ортида кечди ва уч соатдан кўпроқ давом этди. Учрашув вақтида томонлар фақат бир марта танаффус эълон қилган.
«Гуманитар йўлаклардаги логистика масаласида бир қатор яхши ўзгаришлар мавжуд. Вазиятни тартибга солиш юзасидан базавий сиёсий блок, ўт очишни тўхтатиш ва хавфсизлик кафолатлари бўйича маслаҳатлашувлар давом этмоқда», — дея учрашув якунларидан кейин ахборот берган Украина президенти офисининг маслаҳатчиси Михаил Подоляк.
Музокаралар давомида Россия томони Украина делегацияси олдига гуманитар йўлаклар масаласини қўйган, дея баёнот қилди Россия президентининг ёрдамчиси Владимир Мединский.
Россия 8 мартдан бошлаб гуманитар йўлакларнинг ишлаб кетишига умид қилмоқда. Мединскиянинг сўзларига кўра Украина буни таъминлашга ваъда берган.
«Музокаралардан кутган умидларимиз ўзини оқламади. Келаси сафар одингга сезиларли даражадаги қадамлар қўйилишига умид қиламиз», — дея қўшимча қилган Мединский.
Москва ва Киев делегациялари Украинада уруш бошланганидан бери жами уч марта ўзаро учрашди. Музокараларнинг биринчи раунди – 28 февралда, 2-раунди эса 3 мартда ўтказилган.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)