Жанубий Кореянинг Пусан шаҳри портида 8 та махсус ёнғин ўчириш ва тиббиёт техникасини беғараз мақсадда Ўзбекистонга юбориш маросими бўлиб ўтди, деб хабар беради «Дунё» агентлиги.
Махсус техникаларни юбориш маросимида Ўзбекистоннинг Сеулдаги элчихонаси Жанубий Корея Миллий ёнғин хавфсизлиги хизмати, Жанубий Корея—Ўзбекистон бизнес ассоциацияси ва Корея ёнғин хавфсизлиги ассоциацияси вакиллари билан биргаликда иштирок этган.
Мазкур техникалар Ўзбекистонга 2022 йилнинг апрель май ойида етказиб келиниши режалаштирилмоқда. Жанубий Корея томони махсус техникаларни топширишдан ташқари улардан фойдаланиш бўйича ўқув курсларини ташкиллаштириш ниятида.
Тадбир давомида томонлар икки давлат ўртасида ёнғин хавфсизлиги соҳасидаги ҳамкорликни ривожлантиришда ижобий динамикани қайд этган. Хусусан, Ўзбекистон ФВВ Ёнғин хавфсизлиги ва фавқулодда вазиятлар илмий-тадқиқот институти билан Жанубий Корея ёнғин хавфсизлиги институти ўртасида ҳамкорлик меморандуми имзоланиб, мунтазам тажриба алмашиш мақсадида идоралараро ҳамкорликнинг бевосита алоқалари йўлга қўйилган.
Томонлар ёнғин хавфсизлиги соҳасида ҳамкорликни янада фаоллаштиришга тайёр эканликларини билдирган.
Эслатиб ўтамиз, 2020 йил апрель ойининг якунида эса Жанубий Корея томонидан Ўзбекистонга умумий қиймати 250 минг АҚШ долларига тенг бўлган диагностика тўпламлари тақдим этилди. Июнь охирларида мамлакат коронавирусга қарши курашиш учун Ўзбекистонга 5 миллион доллар ажратганди. 2021 йилнинг октябрида Жанубий Корея Ўзбекистонга коронавирусга қарши кураш учун яна 5 миллион доллар ажратган. 2021 йилнинг декабрида эса Жанубий Корея Ўзбекистон ФВВга 8 та автомобиль ва махсус техникани беғараз топширган эди.
Изоҳ (0)