Ўзбекистон карамни рекорд даражада карам экспорт қилишда давом этмоқда. Бу ҳақда EastFruit нашри маълум қилди.
Бундан бир ой олдин 2022 йилнинг январь ойида Ўзбекистонда карамнинг асосий турлари экспорти рекорд ҳажмда бўлган эди. Бунинг сабаби ташқи бозорларда ушбу маҳсулотга талаб кескин ошганидир. Февраль ойида ҳам асосий ташқи бозорларда вазият оқ бошли карам, Пекин карами, гулкарам ва брокколи етиштирувчи ўзбекистонлик фермерлар ва эксперт қилувчилар учун қулайлигича қолди.
Ўзбекистон Республикаси Божхона қўмитасининг дастлабки маълумотларига кўра, 2022 йилнинг февраль ойида карамнинг асосий турлари бўйича экспорт ҳажми қуйидагича кўриниш касб этди:
- Оқ бошли карам — 17,2 минг тонна, бу 2021 йилнинг шу ойига нисбатан 2,2 баробар кўп;
- Гулкарам ва брокколи — 2,5 минг тонна, бу 2021 йилнинг февраль ойига нисбатан 62 фоизга кўп;
- Пекин карами — 710 тонна, бу 2021 йилнинг февраль ойига нисбатан 3,6 баробар кўп.
2022 йилнинг январь–февраль ойларида Ўзбекистон жами 28 минг тонна оқ бошли карам экспорт қилди, бу 2021 йилнинг шу даврига нисбатан 2,1 баробар кўп кўрсаткичдир.
Қайд этилишича, февраль ойининг биринчи ўн кунлигида Ўзбекистонда карам экиладиган майдонлар кескин кўпайган. Бу эса ушбу турдаги сабзавот бўйича нархлар яқин ойлар ичида минтақа бўйлаб барқарорлашуви ва ҳатто пасайишига олиб келиши мумкин.
Аввалроқ Ўзбекистон бозорларидаги озиқ-овқат маҳсулотларининг нархлари маълум қилинган эди.
Изоҳ (0)