Покистон пойтахти Исломобод шаҳрида 4 март куни Шавкат Мирзиёев ва Покистон президенти Ориф Алвийнинг учрашуви бўлиб ўтди. Бу ҳақда Президент матбуот хизмати хабар қилди.
Қайд этилишича, президентлар бир-бирини самимий қутлаб, Ўзбекистон ва Покистон ўртасидаги стратегик шериклик муносабатлари ҳар томонлама ривожланаётганини қайд этган. Мирзиёевнинг Покистонга давлат ташрифи тарихий аҳамиятга эга экани ҳамда ҳамкорликни кенгайтиришга туртки бўлиши таъкидланган.
2022 йилда икки мамлакат дипломатик муносабатлар ўрнатилганининг 30 йиллигини нишонлайди. Таъкидланишича, ўтган вақт мобайнида сиёсий мулоқот ва ҳамкорликда катта муваффақиятларга эришилган. Ўзаро товар айирбошлашда жадал суръат кузатилгаб. Ўтган йили, пандемияга қарамай, унинг ҳажми 50 фоиздан зиёдга ошган.
Учрашувда савдо-иқтисодий ва инвестициявий алоқаларни изчил кенгайтиришнинг долзарб масалалари муҳокама қилинган. Давлат раҳбарлари Покистонга давлат ташрифи чоғида эришилган келишувларни олқишлаган. Ҳамкорликни, шу жумладан гуманитар соҳада кенгайтириш учун улкан салоҳият мавжудлиги таъкидланган.
Томонлар шерикликнинг ушбу йўналишини ҳар томонлама ривожлантиришга тайёр эканини тасдиқлаган. Ўзбекистон президенти астрономия, астрофизика, физика, математика, вирусология ва робот техникаси бўйича илмий-амалий тадбирларни ўтказишда Ислом ҳамкорлик ташкилотининг «КОМСТЕК» илмий-техник ҳамкорлик бўйича доимий қўмитаси имкониятларидан фойдаланишни таклиф этган.
Томонларни қизиқтирган минтақавий ва халқаро аҳамиятга молик масалалар юзасидан фикр алмашилган. Минтақавий хавфсизлик ва Афғонистондаги вазиятга алоҳида эътибор қаратилган. Шавкат Мирзиёев Ориф Алвийга меҳмондўстлик учун миннатдорлик билдириб, яқинлашиб келаётган миллий байрам – Покистон куни муносабати билан самимий табрик ва энг эзгу тилакларини изҳор этган ҳамда уни ўзига қулай вақтда мамлакатга ташриф билан келишга таклиф этган.
Учрашув илиқ ва дўстона муҳитда ўтган. Томонлар кўп қиррали муносабатларни кенгайтиришга мақсади қатъий эканини тасдиқлаган
Шу билан Шавкат Мирзиёев Покистонга давлат ташрифини якунлаб, Тошкентга жўнаб кетди.
Эслатиб ўтамиз, Шавкат Мирзиёев 3–4 март кунлари Покистонга ташриф буюриши хабар қилинганди. Кейинроқ давлат раҳбари Покистонга жўнаб кетгани ва етиб боргани ҳақида хабар берилди.
Изоҳ (0)