Ватандош жамоат фонди Украина атрофида бўлаётган вазият муносабати билан Ўзбекистон фуқароларига мурожаат билан чиқди. Унда хориждаги ҳарбий ҳаракатларда иштирок этмаслик тавсия этилади.
Қайд этилишича, олиб борилаётган мулоқотлар ва тушунтириш ишларига қарамай, айрим ўзбекистонликлар турли давлатларнинг манфаатларига хизмат қилувчи баъзи манбаларга таяниб, маълум миқдордаги пул маблағлари, катта ваъдалар, жумладан, турли шартномалар тузиш орқали фуқаролик бериш ва бошқа чақирувларга ишониб, хатарли вазиятларга тушиб қолмоқда. Шу муносабат билан, хориждаги фуқаролар қуйидаги тавсияларга амал қилишга чақирилган:
- бошқа давлатлар ички ишларига аралашмаслик;
- ҳар хил чақириқлар ва оқимларнинг алдовларига ишонмаслик;
- ҳеч қандай зиддиятли ва қуролли вазиятларга аралашмаслик;
- ўқотар қуролларни қўлга олмаслик ва улардан фойдаланмаслик (ғайриихтиёрий равишда қотилга айланиб қолмаслик);
- вазиятни чигаллаштирувчи ҳеч қандай шиорларни тарғиб қилмаслик;
- низолашаётган тарафларнинг байроғи, мадҳиялари, рамзлари ва шиорларини ишлатмаслик (Ўзбекистон фуқароларига нисбатан салбий муносабат шаклланиб қолишининг олди олинади).
Маълумот учун, Жиноят кодексининг 154-моддасида низолашаётган давлатнинг фуқароси ёки ҳарбий хизматчиси ҳисобланмаган шахснинг моддий манфаатдорлик ёки бошқа бирон шахсий манфаатни кўзлаб, ўзга давлат ҳудудида ёки унинг тарафини олиб қуролли тўқнашувда ёхуд ҳарбий ҳаракатларда қатнашиш учун ёлланишига жавобгарлик белгиланган. Бу жиноятни содир этган шахс беш йилдан ўн йилгача озодликдан маҳрум қилиш билан жазоланади.
Бундан аввал Украинадан эвакуация қилинган Ўзбекистон фуқароларининг сони 1 186 нафарга етгани ҳақида хабар берилганди. Ўзбекистоннинг Польшадаги элчиси Баҳром Бобоевнинг сўзларига кўра, Украина ҳудудида бўлган 1,5 минг нафардан зиёд Ўзбекистон фуқароси Польша орқали эвакуация қилиниши режалаштирилган. Ўзбекистон Транспорт вазирлигининг маълум қилишича, Украинадан Польша ҳудуди орқали ватанга эвакуация қилинган фуқаролардан авиачипталар учун пул ундирилмайди.
Изоҳ (0)