Украинада яшаётган ўзбекистонликларни Польша орқали мамлакатга эвакуация қилиш ишлари давом этмоқда. 1 март куни соат 21:00 да Ўзбекистонга учинчи махсус авиарейс етиб келди. «Дарё» мухбири Тошкент халқаро аэропортида бўлиб, Украинадан келган фуқаролар билан суҳбатлашди.
Бу гал ватанга қайтганларнинг аксарияти шиддатли жанглар кечаётган Харьков шаҳридан келган. Улардан бири Толибжон Маматоҳиров бомбалар портлашига гувоҳ бўлгани, бошидан кечирган қийинчиликларни сўзлаб берди.
«Харьковда 24 февраль куни азонда портлашлар бошланди. Ҳамма ишимизни ташлаб бошпанага қочдик. 1 кун олдин бизга уруш бўлиши айтилганди. Шаҳар марказида яшар эдик. Биздан 2 квартал нарига бомба тушди. У ёнингизда портласа, одамни қалтиратиб юбораркан. Яқинимизда портлаган бомба ойналарни сочиб юборди. Бундай нарсани эртак деб ўйлардим. Кўз билан кўриб, қулоқ билан эшитгандан сўнг, бу ниҳоятда ёмон эканини англадим. Уй, машина, топган пулларимизнинг ҳаммасини ташлаб қочдик. Ўзим ва оилам соғлиги учун у ердан қочишга тўғри келди. Шаҳарда аҳоли қолмади. Ҳамма Польшага чиқиб кетди. Ҳалок бўлганларни ҳам кўрдим. Кўп қаватли уйларда ҳам бомбалар портлади.
25 февраль куни биздан 4 километр узоқликдаги танк ишлаб чиқарадиган заводни портлатишди. Ўшанда ниҳоятда қўрқинчли бўлди. Ишонсангиз, уйда қандай кийиниб турган бўлсак, шундай йўлга чиқдик. Кўлимизга ҳеч нарса олмадик, ола олмадик ҳам. Ҳозир Тошкентдан Фарғонага етиб олгани ёнимизда йўлкирамиз ҳам йўқ. Ўзбекистон элчихонасига раҳмат, бизни яхши кутиб олиб, ватанга қайтишимизга катта ёрдам берди», — деди у.
Толибжон Маматоҳировнинг аёли Шаҳноза Турғунова ҳам кўрган кечирганларини гапириб, оила бомбардимон пайтида 3 сутка ертўлада яшаганини айтди.
«Банғиллаш бошланиши билан ерга ётиб олардик. Ҳовлили уйда яшардик. Бўйи 1 метрли ‘подвал’имиз бор эди. У ерда турган идишларни олиб чиқишга ҳам улгурмай қолдик. Бомбалар портлашни бошлагач, ертўлага тушиб 3 кун яшадик. Зах, совуқда жуда қийналдик. Еб-ичишимиз ўша ерда бўлди. Ертўлага тушаётиб 2–3 та қора нон олиб олгандик. Болаларим ‘нон емайман’, деб йиғлади. Иложсиз едик. Шунақа қилиб кун кўрдик.
Метроларда болалар туғилди. Болаларим билан метрога қочмоқчи бўлдик, аммо улгурмадик. Эрим ташқарига чиқса, гумбурлаган овозлар келарди ва югуриб ортига қайтарди. Заводга қараб отилган айрим бомбалар кўпқаватли уйларга тушган. Жуда қўрқинчли эди. Львовга келиб олгунча ҳам юрак бизники бўлмади. Қаттиқ қўрқув остида эдик. Ўзбекистонни ҳеч қаерга алмашмайман. Қаттиқ нон есак ҳам умримиз энди шу ерда ўтади», — деди аёл.
Украинанинг Харьков шаҳрида таҳсил олаётган талабалардан бири Шаҳризода Файзиева ҳам махсус авиарейсда Тошкентга етиб келди. Унинг айтишича, Харьков бомбардимон оқибатида харобага айланган.
«24 февраль куни саҳарда бомба шунақа портладики, деразадан ташқарига қарасам атроф туман бўлиб кетган эди. Кўз очиб бўлмасди. Ҳамма йиғлаган, шок ҳолатга тушганди. Кейин бизни ертўлага олиб тушиб кетишди. Жуда ҳам қўрқдик. У ерда 5 соат ўтирдик. Овқат ейиш учун юқорига чиқсак, яна гумбурлашлар, отишмалар овози келарди. Бир нарсани бемалол еб-ичиб бўлмасди. Ухлаймиз-у, бир неча дақиқадан сўнг яна портлаш эшитиларди, яна қўрқиб уйғонардик. ‘Подвал’да 3 кун яшадик. Ҳозир Харьковнинг аҳволи жуда ҳам ёмон. Шаҳар 1–2 йилсиз ўзига келмайди. Ҳатто ҳокимиятгача портлатиб юборилди. Умуман юрадиган жой қолмаган. Ҳамма жой вайрон бўлиб кетган. Кўчада аскарлар автоматлар билан ўтишибди.
Польшага кетишда вокзалда ўтирганимизда ҳам тепамизда бомбалар портлайверди. Биз «Ўзбекистонга ета олмаймиз, ўша ерда қолиб кетамиз», — деб жуда ҳам қўрқдик. Киевда 5-6 соатлаб сувсиз, овқатсиз қолсак ҳам чидадик, ‘уйга етиб олсак бўлди’, дедик.
Дарслар онлайн бўлаётганди. Аммо 9 мартдан университетда бўлиши керак эди. Кўп давлатлар талабалари ўз мамлакатига кетганди. 24 февраль куни бошланган портлашлар сабабли ҳамма ўз давлатига қочиб кета бошлади. Ҳатто украинлар ҳам бошқа давлатларга кетди. Ҳозир кўп талабаларнинг паспорти турар жойларида қолиб кетган. Паспортсиз кетаётганлар ҳам кўп. Ўзбекистонга келганимга шукр дейман. Ҳозир Харьков шаҳрида қолиш жуда катта хато. Шу ўринда президентимиздан Украинада ўқиётган талабалар ўқишини Ўзбекистондаги университетларга ‘перевод’ қилишда ёрдам берилишини сўраб қоламан. Чунки энди Украинага бориш хавфли», — деди талаба.
Маълумот учун, Украина ҳудудида бўлган 1,5 минг нафардан зиёд Ўзбекистон фуқароси Польша орқали эвакуация қилиниши режалаштирилган. 2 март ҳолатига кўра, умумий ҳисобда Украинадан Польша ҳудуди орқали бешта авиарейслар билан 1 минг 186 нафар Ўзбекистон фуқароси олиб келинган.
Изоҳ (0)