Ўзбекистон Ташқи ишлар вазирлиги расмий вакили Украинадан эвакуация қилинаётган ўзбекистонликлар ҳақида қўшимча маълумот берди.
Қайд этилишича, Ўзбекистоннинг Польшадаги элчихонаси томонидан фуқароларни Украинадан Польша орқали ватанга қайтариш бўйича тизимли ишлар амалга оширилмоқда. Польша ҳудудида ташкил этилган тўпланиш жойида асосий қисми ёш боласи бор аёллардан иборат Ўзбекистон фуқаролари учун шароитлар яратилган. Хусусан, кўрпа-тўшак, тиббий ёрдам, иссиқ овқат берилган.
27 февраль Тошкент вақти билан соат 16:00 га қадар 110 га яқин Ўзбекистон фуқароси «Карчова» назорат-ўтказиш пункти орқали Польша ҳудудига кирган. Яқин вақтда ичида бошқа фуқароларнинг ҳам чегарадан ўтиши кутилмоқда. Шундан сўнг барча ўзбекистонликлар марказлашган ҳолда автобусларда Катовице шаҳридаги аэропортга етказилади.
Ўзбекистонлик дипломатлар «Карчова» назорат-ўтказиш пункти ва Катовице шаҳри аэропортида мунтазам фаолият юритмоқда ва фуқароларнинг масалаларини ҳал қилмоқда. Эвакуация қилинаётган барча фуқаролар аэропортда барча зарур маҳсулотлар билан таъминланади.
Турли сабабларга кўра ёнида ҳужжатлари бўлмаган 30 нафар Ўзбекистон фуқаросига қайтиш гувоҳномаси зудлик билан расмийлаштириб берилган.
Ўзбекистон фуқароларини Польшадан ватанга қайтариш мақсадида Uzbekistan Airways самолётларининг ўтиши учун ҳаво йўлаги билан таъминлаш масаласи ҳал қилинган. Ҳозирча биринчи самолётнинг Ўзбекистонга парвоз қилиши 28 февраль кунига режалаштирилмоқда.
Польша Ташқи ишлар вазирлиги Ўзбекистон элчихонасининг мурожаатидан сўнг ниҳоятда муҳим қарорни қабул қилган: ватанга қайтаётган Ўзбекистон фуқаролари томонидан ҳеч қандай ПЗР-сертификатларини тақдим этиш ва Польшага кириш визасини расмийлаштириш талаб қилинмайди.
Эслатиб ўтамиз, Ўзбекистон Ташқи ишлар вазирлиги Украина ҳудудида 4300 га яқин Ўзбекистон фуқароси борлигини маълум қилганди.
Ўзбекистоннинг Украинадаги элчихонаси хабарига кўра, 26 февраль куни Тошкент вақти билан соат 20:30 да 90 дан зиёд Ўзбекистон фуқароларидан иборат биринчи эвакуация гуруҳи Львовдан «Краковец» назорат-ўтказиш пункти йўналиши бўйлаб йўлга чиққан.
Кейинроқ элчихона мамлакатдаги ўзбекистонлик фуқароларни эвакуация қилиш ишлари ҳақида қўшимча маълумот берди. Унда айтилишича, чегарани кесиб ўтиш узоқ вақт олади, биринчи гуруҳ учун бу жараён 14 соат давом этган.
Элчихона, шунингдек, мамлакатни тарк этиш учун Молдовага кетмоқчи бўлган фуқароларга мурожаат билан чиқди. Элчихона хавфсизлик тамойилидан келиб чиқиб, фуқаролар учун Молдовага бориш осонроқ бўлса, ушбу вариантни кўриб чиқишлари лозим эканини билдирган.
Ташқи ишлар вазирлиги берган маълумотга кўра, 27 февраль ҳолати бўйича 600 дан зиёд Ўзбекистон фуқароси Польша чегарасига етказилган. Фуқароларини эвакуация қилиш ишлари изчил давом этмоқда.
Изоҳ (0)