Украинадаги Ўзбекистон фуқароларининг қанчаси Польша чегарасига етказилгани маълум қилинди

Ташқи ишлар вазирлиги расмий вакили Украинадан Польшага эвакуация қилинаётган ўзбекистонликлар ҳақида маълумот берди.

Қайд этилишича, 27 февраль куни Украинанинг Львов шаҳридан Ўзбекистон фуқароларидан иборат навбатдаги гуруҳ Украина—Польша чегарасидаги «Краковес—Карчова» назорат-ўтказиш пунктига йўлга чиққан.

Бундан ташқари, Ўзбекистоннинг Украинадаги элчихонаси тақдим этган маълумотга кўра, шу вақтгача 600 дан зиёд Ўзбекистон фуқароси Польша чегарасига етказилган.

Элчихона вакилларининг маълум қилишича, Ўзбекистон фуқароларини эвакуация қилиш ишлари изчил давом этмоқда.

Ташқи ишлар вазирлиги Украина—Польша чегараси томон йўл олган ўзбекистонликлар акс этган видеолавҳани илова қилган.

Эслатиб ўтамиз, Ўзбекистон Ташқи ишлар вазирлиги Украина ҳудудида 4300 га яқин Ўзбекистон фуқароси борлигини маълум қилганди.

Ўзбекистоннинг Украинадаги элчихонаси хабарига кўра, 26 февраль куни Тошкент вақти билан соат 20:30 да 90 дан зиёд Ўзбекистон фуқароларидан иборат биринчи эвакуация гуруҳи Львовдан «Краковец» назорат-ўтказиш пункти йўналиши бўйлаб йўлга чиққан.

Кейинроқ элчихона мамлакатдаги ўзбекистонлик фуқароларни эвакуация қилиш ишлари ҳақида қўшимча маълумот берди. Унда айтилишича, чегарани кесиб ўтиш узоқ вақт олади, биринчи гуруҳ учун бу жараён 14 соат давом этган.

Элчихона, шунингдек, мамлакатни тарк этиш учун Молдовага кетмоқчи бўлган фуқароларга мурожаат билан чиқди. Элчихона хавфсизлик тамойилидан келиб чиқиб, фуқаролар учун Молдовага бориш осонроқ бўлса, ушбу вариантни кўриб чиқишлари лозим эканини билдирган.