Донбасс ва Луганск аҳолиси Россияга эвакуация қилинмоқда. Украина ҳарбий операциялар бошлаши ҳақидаги айбловларни инкор этди. Асосий маълумотлар
Донбасс Халқ Республикаси одамларнинг Россияга эвакуация қилиниши ҳақида хабар берди. ДХР раҳбари Денис Пушилин биринчи навбатда аёллар, болалар ва кекса кишилар олиб кетилишини билдирди. Унинг сўзларига кўра, эвакуация қилинганлар Ростов вилоятига жойлаштирилади, у ерда одамларга барча зарур шарт-шароитлар яратилади. Пушилиннинг мурожаатидан кейин Донецкда сиреналар ёқилди, фуқаролар эса банкоматлар олдида турнақатор навбатлар ҳосил қилди.
Кейинроқ Луганск Халқ Республикаси ҳам аҳоли эвакуацияси бошланишини эълон қилди. Луганск раҳбари Леонид Пасечник ўзини хавфсизликда сезмаётган, ҳаёт кечириши учун зарур ижтимоий ҳимояга муҳтож аҳолидан қисқа вақт ичида Россияга кетишни сўраган.
Ростов вилояти губернатори Россия президентига мурожаат қилди. Ҳудуд раҳбари Василий Голибев Владимир Путиндан қочоқларнинг катта оқимини бошқариш учун фавқулодда тезкор ёрдам кўрсатишни илтимос қилди, дея хабар қилган Россия президентининг матбуот котиби Дмитрий Песков. Ўз навбатида Путин Ростов вилоятига фавқулодда вазиятлар вазири вазифасини бажарувчи Александр Чуприянни юбориб, унга Донбассдан келаётган одамлар учун зарур шарт-шароитларни ҳозирлашни буюрган. Шунингдек, Россия президенти ҳукуматга Донбасс ва Луганскдан келган ҳар бир одам учун 10 минг рублдан тўлаш ҳақида топшириқ берган.
ДХР ва ЛХР эвакуацияга ҳудуддаги кескинликнинг кучайиши сабаб бўлганини қайд этган. «Сўнгги ойларда ДХРда Украина ҳарбийлари кўпайган ва қурол-яроғлар ҳам жойлаштирилмоқда, Владимир Зеленский ҳам тез орада ҳарбийларга ҳужумга ўтиш юзасидан топшириқ бериши мумкин», – деган Пушилин. Пасечник эса зўравон Украина ҳужум эҳтимоли юқори бўлган ҳудудларда провокация ва фитналар билан ЛХР ҳудудига бостириб кирмоқчилигини таъкидлаган. У Луганскда қўлига қурол олишни уддалайдиган барча эркаклардан ўз ерини ҳимоя қилишни сўраган.
Пушилин эвакуация ҳақида гапиргандан бир неча соат вақт ўтгач, янги ҳужумга ҳозирлик кўрилаётгани, уруш бошланиши мумкинлиги 100 минглаб одамлар Россияга қочоқ сифатида бориши ҳақида гапирган. ДХР фавқулодда вазиятлар вазирлиги 700 минг нафар одамнинг эвакуация қилинаётганини маълум қилган. Дастлабки автобуслар маҳаллий вақт билан 20:00 да Ростов томон йўл олган.
Украина Донбассга ҳужум қилишга шайланаётгани ҳақидаги хабарларни инкор этди. «Россия пропагандасининг Украина ҳарбий ҳужум операцияларига тайёрланаётгани ҳақидаги хабарларини инкор қиламиз. Украина Донбассда бу каби ҳаракатлар қилмайди ва уларни режалаштирмаган. Биз вазиятни дипломатик йўл билан ҳал этишга эътиборимизни қаратганмиз», — деб ёзган Twitter’да Украина ташқи ишлар вазири Дмитрий Кулеба. Украина қуролли кучлари бош қўмондони Валерий Залужний Донбасснинг украиналик ҳарбийлар ҳужуми ҳақидаги баёнотлари ҳақиқатдан йироқлигини қайд этган. Мамлакат президенти Владимир Зеленский вазият юзасидан изоҳ бермаган.
Донбасс аҳолиси 18 февралда Россияга эвакуация қилина бошлаган. «Интерфакс» агентлиги биринчи навбатда Донецкдаги 1-мактаб-интернатнинг 225 нафар етим болалари Ростовга олиб келинган. Горловка (Донбассда) аҳолиси учун автобуслар маҳаллий вақт билан 19:30 да етиб борган. Шаҳар маъмурияти эвакуация қилинадиган одамлар тўпланадиган манзиллар ва ўзи билан олиш зарур бўлган бирламчи буюмлар ҳақидаги рўйхатни эълон қилган. Шунингдек, маҳаллий бошқарув органи 20:00 ДХРдаги Ясуноватая шаҳрида аҳолини эвакуация қилиш бошланиши ҳақида маълумот берган.
ЛХР ҳукумати биринчи навбатда тўқнашув юз бериши мумкин бўлган ҳудудлардаги аҳолини хавфсиз ерга кўчирмоқчи. Республика таълим вазирлиги барча ўқув муассасаларидаги дарсларни вақтинча тўхтатган, шунингдек болалар уйлари ва мактаб-интернатлардаги ўқувчиларнинг эвакуацияси бошланишини билдирган.
Донецкдаги ҳукумат биноси олдида портлаш юз берган. ДХР халқ милицияси бошлиғи Денис Синенков «Интерфакс»га унинг автомобили автотураргоҳда портлаб кетганини маълум қилган. Портлашда ҳеч кимга талафот етмаган.
Рубль курси ва Россия қимматли қоғозлар бозори қулади. Маҳаллий вақт билан 19:00да доллар 67,25 дан 76,96 га ошган, евро ҳам 69,75 дан 87,27 га кўтарилган. Асосий савдолар якунига кўра Москва биржаси индекси 3393,31 пункт (-3,4 фоиз), РЦ индекси эса — 1391,31 пунктни (-4,1 фоиз) ташкил этган.
