Ижтимоий тармоқларда Тошкент шаҳридаги «Коинот» (Космонавтлар) мажмуасида Владимир Жанибеков ҳайкали атрофидаги гранит плиталар кўчириб ташлангани ҳақида хабар тарқалганди. Шундан сўнг Маданий мерос агентлиги ҳудуднинг демонтаж ишлари рухсатсиз бошланганини аниқлаган. Агентлик томонидан майдонни реконструкция қилаётган Mimar Group компанияси огоҳлантирилгани ва жараён тўхтатилгани маълум қилинган. Агентлик маълумотларига кўра, 15 февраль куни Космонавтлар майдонини ободонлаштириш лойиҳаси илмий-эксперт кенгашида маъқулланган.
Маълум қилинишича, Маданий мерос агентлигида Илмий-эксперт кенгашининг навбатдаги мажлисида Космонавтлар майдонини ободонлаштириш лойиҳаси муҳокама қилиниб, хулоса тақдим этилган. Унга кўра, кенгаш лойиҳага объектнинг тарихий ва бадиий қийматига таъсир кўрсатмаган ҳолда таъмирлашга рухсат берган.
Шунингдек, Mimar Group томонидан тақдим қилинган лойиҳада аҳолига қулайлик яратиш мақсадида пиёда ва велоспорт йўлаклари, ўйин майдончалари ҳам барпо этилиши кўрсатиб ўтилган.
«Бунда кўкаламзорлаштириш ва дарахтларни асраб-авайлаш, яшил ҳудудни кенгайтириш ҳам, албатта, кўзда тутилади», — дейилади хабарда.
Изоҳ (0)