Шавкат Мирзиёев 16 февраль куни чорвачилик тармоғини қўллаб-қувватлаш, соҳада илғор технологияларни кенг қўллаш орқали гўшт, сут ва тухум ишлаб чиқариш ҳажмини ошириш масалалари юзасидан видеоселектор йиғилиши ўтказди. Йиғилишда давлат раҳбари аҳолини гўшт билан таъминлаш бўйича ўзгариш қилмаган туман ҳокимларини ишдан олиш бўйича таклиф киритиш бўйича топшириқ берди, деб ёзади Президент матбуот котиби.
Йиғилишда таъкидланишича, 2019—2021 йилларда:
- чорвачилик бўйича 8 турдаги субсидия ва имтиёзли кредитлар ажратиш йўлга қўйилган;
- чорвачиликка 15 триллион сўмдан зиёд кредит маблағлари ажратилиб, 4,5 мингга яқин лойиҳа амалга оширилган;
- наслчилик хўжаликлари сони 3 бараварга кўпайиб, 1 минг 414 тага етган;
- чорва моллари сони 1,2 миллионга кўпайган.
Чортоқ, Нарпай, Ургут, Олтинсой, Ўрта Чирчиқ ва Урганч туманларида аҳолини гўшт билан таъминлаш даражаси 40 фоизга етмасада, ушбу туман ҳокимлари 2022 йилда аниқ лойиҳаларни ишга туширишни режа қилмаган.
Шу сабабли, йиғилишда вилоят ҳокимларига бир ойда ўзгариш қилмаган туман ҳокимларини ишдан олиш бўйича таклиф киритиш топшириғи берилган.
Изоҳ (0)