«3,5 йил ҳоким бўлиб, давлатнинг бир сўмига ҳам хиёнат қилмадим» — Жаҳонгир Ортиқхўжаев

Жаҳонгир Ортиқхўжаев Тошкент шаҳар ҳокими сифатида 3,5 йиллик фаолияти давомида бир сўм ҳам давлатга хиёнат қилмагани ва аввал ишлаган компаниялари унга ёрдам бериб туришини маълум қилди. Бу ҳақда ҳоким «Gazeta.uz» нашрида Тошкент шаҳрининг Алишер Навоий кўчасида олиб борилаётган реконструкция ишлари юзасидан чоп этилган «Навоий кўчасини ҳам шоссега айлантиришга қарор қилинди» номли мақолада кўтарилган масалаларга бағишланган матбуот анжуманида айтиб ўтди, дея хабар бермоқда «Дарё» мухбири.

Қайд этиш жоиз, Жаҳонгир Ортиқхўжаев бир ярим соатдан ортиқ давом этган матбуот анжуманининг сўнгги 15 дақиқасида иштирок этди.

Аввал катта компаниялар раҳбари бўлганман, ёшлигимдан сиёсатчи бўлмаганман. Менинг тарихим ишлаб чиқариш, тадбиркорликка боғлиқ. Умрим бўйи сиёсатда ишламаганман. Ҳомийлик масаласига келсак, мен ҳам шу мамлакатнинг фарзандиман. Бозоримиз ҳам, мозоримиз ҳам — Тошкент. 3,5 йиллик фаолиятим давомида кўп жойларга аввалги ишлаган компаниям ёрдам берди, ҳомийлик қилиб келди. Риё деган нарса бор, савоб деган нарса бор. Агар бугунги ҳомийликни айтмасанг савобини нариги дунёда оласан, агар айтсанг риё бўлади. Агар қилган ишларни очиқ-ойдин ҳаммага айтсанг риё бўлади. Шунинг учун бугунгача айтмадик. Лекин бугун кўпчилик суриштирди, майли.

Жаҳонгир Ортиқхўжаев, Тошкент шаҳар ҳокими

У ўзи ишлаган компания — Akfa кўп нарсалардан воз кечаётганини айтиб ўтди.

Akfa ўзида фақат ишлаб чиқаришни олиб қолади, қолган — дўкон, супермаркет, гипермаркетларини сотиб юборади. Бу йил ҳам Ecobozor’ни сотди ва тушган пулнинг ярми билан ўзининг банкдаги қарзларини тўламоқчи. Бундан ташқари, Akfa medline компанияси 200 нафар юрак нуқсони билан туғилган болаларни операция қилмоқчи, ўтган йили 75 нафари операция қилган эди. Айтмоқчи эмасдим, лекин мажбур бўлдим. Бундан ташқари, кўп қилган ишлари бор. Бу йил ҳам Akfa ва Artel компанияси ёрдам бериш мақсадида «нима ёрдам қилайлик?», деб сўради. Улар ўз мол-мулкларини сотяпти, яримини банкдаги кредитларидан қутулишга беряпти, яримини эса шаҳардаги парклар, аллеяларга сарфлаб, менга ёрдам беряпти. Ёш болалар операцияси, ночор уйларнинг томларини ёпиб бериш, кичик маҳаллаларни асфальтлаш каби нарсаларга харажат қилинмоқда. Агар очиқчаси керак бўлса шу.

Жаҳонгир Ортиқхўжаев, Тошкент шаҳар ҳокими

Унинг таъкидлашича, 2022 йил дастлабки олти ойи ҳисобидан ҳокимликка 80 миллиард сўм ёрдам пули кўрсатилади.

Мен шунга асосланиб, уларга ўз илтимосларимни айтяпман. Бошқа нарса деёлмайман. Мен чарчадим. 3,5 йил ишлаган бўлсам давлатнинг бир сўм пулига хиёнат қилмадим. Олдимдан қўшган бўлсам қўшдим, лекин бир сўмига хиёнат қилмадим. Шаҳар ҳокими бўлишимдан аввал 35 та машинам бор эди. Жудаям машиналарни яхши кўраман. Ҳозир эса олтита қолди. Яқинда яна битта машинамни аукционга қўяман, унинг пулига эса юрагида нуқсони бор болаларни операция қилдирамиз. Агар булар гуноҳ бўлса розиман, агар бу пулни ишлатма шунга десангиз ҳам розиман. Лекин менинг айбим — қилган ишларни айтиб туриши керак экан инсон. Айтмаганим — гуноҳ. Сергелидан уйи йўқ инсонларга 400 та квартира ҳадя қилишган. Шуларни айтсам бўларкан, айтмаганман. Бугун афсусланяпман. Лекин ишонаверинглар, бирор сўм давлатга хиёнат қилмадим. Борим шу.

Жаҳонгир Ортиқхўжаев, Тошкент шаҳар ҳокими

Маълумот учун, 14 февраль, душанба куни Алишер Навоий кўчасида трамвай йўлларини ётқизиш ишлари бошлангани тўғрисида хабарлар тарқалди. Пойтахт ҳокимлиги эса бу борадаги хабарларни рад этиб, Алишер Навоий кўчасидаги таъмирлаш ишлари режага мувофиқ бошланганини қайд этди. «Gazeta.uz» нашри эса 15 февраль куни мазкур таъмирлаш ишлари пойтахтликларни огоҳлантирмасдан бошланганини қайд этиб, президент Шавкат Мирзиёевга мурожаат тарзида «Навоий кўчасини ҳам шоссега айлантиришга қарор қилинди» мақоласини эълон қилди.