Тошкентнинг Алишер Навоий кўчасида трамвай бўлмайди. Бу ҳақда Тошкент шаҳар ҳокими ўринбосари Бахтиёр Раҳмонов 16 февраль куни пойтахт ҳокимлигида бўлиб ўтган матбуот анжуманида айтиб ўтди.
«Дарё» мухбирининг Алишер Навоий кўчасида олиб борилаётган реконструкция ишларидан сўнг трамвай қўйиладиган бўлса, яна қайтадан таъмирлаш ишлари олиб борилиши тўғрисидаги саволига пойтахт ҳокими ўринбосари Бахтиёр Раҳмонов мазкур кўчада трамвай бўлмаслигини айтди.
«У «габорит»да трамвай юриши бўлмайди», — дейди у.
Транспорт бошқарма бошлиғи Анвар Жўраевнинг таъкидлашича, «трамвай бўйича таклифлар бор».
2016 йилнинг 2 май куни Тошкентда ҳаракатланаётган сўнгги трамвай йўналиши — «Бешқайрағоч» даҳаси ва Ипподром ўртасида қатновчи 17-йўналиш ёпилганди.
Шавкат Мирзиёев 19 январь куни Тошкент шаҳрида жамоат транспортини ривожлантириш чора-тадбирлари бўйича тақдимот билан танишганди. «Менимча» кўрсатувида транспорт вазирининг тақдимоти президентга маъқул бўлмагани ҳақида сўз борган. Айнан ушбу кўрсатувда тележурналист Хайрулла Нуриддинов Тошкентга трамвай қатновини қайтариш тарафдори эканини айтиб ўтган эди.
«Шаҳар транспорти мавзуси очилганидан фойдаланиб, яна бир таклифни айтмоқчиман. Аҳолига қулай ва сифатли транспорт хизматини кўрсатиш соҳасини такомиллаштириш мақсадида Тошкентга трамвайларни қайтариш керак, менимча. Катта ва гавжум шаҳарга трамвай жуда асқатади. Ҳаммамизнинг эсимиздаку ўша қулай, бежирим, бир текисда юрадиган, муҳими, экологияга зарар етказмайдиган қадрдон трамвайларимиз. Билмадим, балки хато қилаётгандирман, лекин бу менинг шахсий фикрим. Агар пойтахт мутасаддиларининг ўрнида бўлганимда, ана шу ташаббус билан чиққан бўлардим», — деганди Хайрулла Нуриддинов.
Шавкат Мирзиёев 10 февраль куни Самарқанд вилоятига ташрифи давомида фуқаролар мурожаати сабаб трамвайни Тошкентга қайтаришни айтиб ўтди. «Трамвайни Тошкентга ҳам қайтармоқчимиз. Фуқаролардан бу борада кўплаб хатлар ва мурожаатлар келяпти», — деди президент.
Изоҳ (0)