Тошкент шаҳрида транспорт инфратузилмасини такомиллаштириш, пиёдаларнинг хавфсиз ҳаракатланишига шароит яратиш мақсадида, шунингдек, аҳолидан келиб тушаётган мурожаат ва таклифларга асосан, Олмазор туманида жойлашган Келес йўли кўчасини тўлиқ таъмирлаш лойиҳаси ишлаб чиқилди. Бу ҳақда туман ҳокимлиги матбуот хизмати хабар берди.
Маълум қилинишича, таъмирлаш ишлари Тошкент шаҳар маҳаллий бюджетининг қўшимча даромадлари ҳисобидан амалга оширилади.
Лойиҳани ишлаб чиқишда, ушбу кўчада жойлашган умумий ўрта ва мактабгача таълим муассасалари, масжидлар, бошқа ташкилотларга қатновчи аҳоли хавфсизлигини таъминлашга, муаммоли чорраҳаларда қўшимча светофор ва йўл белгиларини ўрнатишга алоҳида эътибор қаратилган. Барча чора-тадбирлар Давлат экология ва атроф-муҳитни муҳофаза қилиш қўмитаси, Уй-жой коммунал хизмат кўрсатиш ҳамда Транспорт вазирликларининг мутахассисларини жалб қилган ва ушбу ташкилотлар билан келишилган ҳолда ишлаб чиқилиб, амалга оширилмоқда.
«Келес йўлини таъмирлаш ишлари натижасида, йўлнинг қатнов қисми кенгайтирилиб, 6 полосали бўлади, пиёдалар ва велойўлаклар ташкил этилади, йўлнинг чекка қисмларида иқлимга мослашган чинор, каштан дарахтлари экилиб, суғориш ва дренаж тизимлари ўрнатилади», — дейилади хабарда.
Аввалроқ Тошкентнинг Мустақиллик шоҳкўчасидан ўтган туннел реконструкция қилинаётгани тўғрисида хабар берилганди. Реконструкция давомида туннель деворлари фибро бетон билан қопланади, ёритиш тизими таъмирланади.
Изоҳ (0)