Украинанинг олигарх ва бизнесменлари мамлакатни оммавий равишда тарк этмоқда — «Украинская Правда»

13 февраль куни Киевдан ичида украиналик олигарх ва бизнесменлар бўлган 20 га яқин чартер рейс ҳамда шахсий самолётлар учиб кетди. Бу каби ҳолат сўнгги олти йилдан бери биринчи марта кузатилмоқда, деб хабар беради «Украинсая правда».

Шу куни Украинани Ринат Ахметов (Forbes версияси бўйича энг бой украиналиклар орасида 1-ўрин) ва Борис Колесников (55-ўрин)нинг самолётлари Украинани тарк этган. Нашр маълумотларига кўра, аслида Ахметов мамлакатдан 30 январда чиқиб кетган, ҳозирда Киевдан унинг самолётларидан бири учиб кетган, холос. Колесников эса Украинада экани ва ҳеч қаерга кетмоқчи эмаслигини маълум қилган.

Сўнгги ҳафтада Украинани кўплаб бизнесменлар тарк этган. 30 январь куни Виктор Пинчук (Forbes рўйхатида 2-ўрин), 10 февралда — Вадим Новинский (8-ўрин) ва Александр Ярославский (9-ўрин), 12 февралда — Василий Хмелниский (29-ўрин) ва Вадим Столар (64-ўрин), 13 февраль — Андрей Ставницер (49-ўрин) ва Вадим Нестеренко (96-ўрин) мамлакатдан чиқиб кетган.

Ставницернинг вакили бизнесмен ҳозирда хизмат сафарида экани ва тез орада қайтишини билдирган. Хмелнискийнинг матбуот хизмати сафар олдиндан режалаштирилгани ва у 20 февралда қайтишини, бизнесменнинг фарзандлари Украинада эканини маълум қилган.

Нашр манбаларига кўра, украиналик тадбиркор, «Мухолифат платформаси — ҳаёт учун» фракцияси депутати Игорь Абрамович 50 кишилик самолёт буюртма қилган. Самолёт Киевдан Венага бизнесмен билан битта партияда бўлганнинг қариндошларини, шунингдек, бизнес-шерикларини олиб бориши керак.

Аввалроқ АҚШ давлат котиби Энтони Блинкен Россиянинг Украинага босқини исталган вақтда, жумладан, Пекиндаги Олимпиада ўйинлари якунлангунига қадар бошланиши мумкинлигини маълум қилганди. МРБ ва Америка ҳарбийлари НАТОга аъзо давлатларни Россия босқинчилик ҳаракатларини 16 февраль куни бошлаши мумкинлиги борасидаги ўз хавотирлари ҳақида огоҳлантирган. АҚШ президентининг миллий хавфсизлик бўйича маслаҳатчиси Жейк Салливан эса АҚШ расмийлари Россия келаси ҳафтанинг исталган куни Украинага бостириб кириши мумкин, деб ҳисоблашини, аммо ҳужумнинг аниқ санасини билмаслигини айтган.