Рақиб директорига зарба берган Пепе 2 йилга футболдан четлатилиши мумкин

«Порту» ҳимоячиси Пепе «Спортинг»га қарши ўйиндаги ҳаракатлари учун жазоланиши мумкин.

Португалия чемпионати доирасидаги «Порту» ва «Спортинг» ўртасидаги учрашувдан сўнг (2:2), жамоаларнинг футболчи ва ходимлари ўртасида оммавий муштлашув юзага келганди. Ҳакамнинг ўйиндан кейинги ҳисоботида 38 ёшли Пепе «Спортинг» директорига зарба бергани ҳам қайд этилган.

Лиганинг интизом қоидаларига кўра, эндиликда футболчи икки ойдан икки йилгача бўлган муддатга футболдан четлатилиши мумкин.

Худди шундай жазо «Спортинг» футболчиси Бруно Табатани ҳам кутмоқда. У «Порту» директорини туртиб юборган.

Эслатиб ўтамиз, чемпионатнинг 22-туридан ўрин олган «Порту» ва «Спортинг» ўйини якунлангандан сўнг иккала клубнинг деярли барча футболчилари ўртасида жанжал юзага келганди. Натижада ҳакам тўртта қизил карточка кўрсатишга мажбур бўлган эди. «Порту» сафида Агустин Маркесин ва Пепе, «Спортинг» сафида эса Жоау Палиня ва Табата майдондан четлатилганди.