Ўзбекистон терма жамоасини Осиё ўйинларида чемпион қилган футбол профессори Рустам Акромов вафот этди

Собиқ мураббий, футбол профессори Рустам Акромов 73 ёшида вафот этди. Бу ҳақда ЎФА матбуот хизмати маълум қилди.

Акромов Ўзбекистон мустақилликка эришгач, мамлакат миллий терма жамоасини бошқарган илк мураббий эди. 1992—1994 йиллар мобайнида Ўзбекистон термасида фаолият олиб борган мутахассис жамоа билан 1994 йилги Осиё ўйинларида ғолиб чиққан.

Акромов 1948 йил Тошкент вилоятида туғилган. Футболчилик фаолияти мобайнида «АСК Политотдел» (1967—1973) ва «Пахтакор» (1967—1973) клубларида тўп сурган. Мураббийлик фаолиятини Москванинг «ЦСКА» клуби ёшлар жамоасида бошлаган мутахассис кейинчалик «USM Жазоир» клуби (1990-1991) клубига ўтган. 1992 йилда Жазоир терма жамоасига устозлик қилган. 1992—1994 йилларда Ўзбекистон терма жамоасида фаолият олиб борган. 1994 йилда эса «Пахтакор» клубида бош мураббий сифатида ишлаган. 1995—1997 йилларда Ҳиндистон терма жамоасида ишлаган.

Кейинчалик мутахассис ОФК, ФИФА ташкилотларида инструктор бўлиб фаолият олиб борди.

Рустам Акромов «Шуҳрат» медали ҳамда «Ўзбекистон Республикасида хизмат кўрсатган спорт устози» фахрий унвони билан тақдирланган.