Америка ҳарбийлари Украинадаги жанговар ҳаракатларда иштирок этмайди. Бу ҳақда Пентагон вакили Жон Кирби MSNBC телеканалига берган интервьюсида маълум қилди, деб хабар беради «Интерфакс».
«АҚШ президенти Жо Байден америкалик ҳарбийлар Украинада жангга киришмаслиги бўйича аниқ кўрсатма берди», — дейди у.
Кирбининг қўшимча қилишича, Америка ҳарбий контингентидан Украинадаги АҚШ фуқароларини эвакуация қилишда фойдаланиш «ҳисоб-китоблардаги хатолик хавфини ҳамда Россия ва Америка ҳарбий кучлари ўртасидаги тўқнашув эҳтимолини оширади». Унинг таъкидлашича, бу Украинадаги вазиятни янги даражага олиб чиқиши мумкин.
Февраль бошларида Кирби америкалик ҳарбийлар Украинадаги жанговар ҳаракатларда иштирок этмаслигини маълум қилганди, уларнинг мақсади — «НАТО бўйича иттифоқчиларнинг мудофаасини қўллаб-қувватлаш».
11 февраль куни президенти Жо Байден америкалик ҳарбийлар ҳеч қанақа ҳолатда ҳам фуқароларни эвакуация қилиш учун Украинага юборилмаслигини маълум қилганди. «Агарда америкаликлар ва руслар бир-бирига қарата ўт очса, бу жаҳон уруши бўлади», — дея қўшимча қилганди президент.
12 февраль куни Вашингтон Украина Қуролли кучларидаги аскарларини тайёрлаш билан шуғулланган 150 нафарга яқин америкалик ҳарбий уйга қайтариш бўйича буйруқ берган. «Шахсий таркибимизнинг хавфсизлиги ва ҳимояси — биринчи даражали ташвиш. Биз аввалгидек Украина Қуролли кучлари билан муносабатларимизга содиқмиз», — деганди Кирби.
Аввалроқ Нидерландия, Черногория, Япония ва Жанубий Корея ўз фуқароларига Украинага бормасликни тавсия қилди ва у ерда бўлганлардан мамлакатдан чиқиб кетишни сўраганди. 10 февралда АҚШ давлат департаменти фуқароларга Украинага бормаслик ёки зудлик билан Россия ҳарбий ҳаракатлари хавфи бўлган ва COVID-19 билан касалланишлар кўпайган ҳудуддан кетишни тавсия этган. АҚШ президенти Жо Байден Украинадаги барча америкаликлардан ҳозироқ мамлакатдан кетишни сўраган.
Изоҳ (0)