Яман жанубида Бирлашган Миллатлар Ташкилотининг олти нафар ходими номаълум жангарилар томонидан ўғирлаб кетилди. Бу ҳақда манбаларга таяниб, Yaman Press Agency маҳаллий матбуот агентлиги (YPA) хабар берди.
«Маҳаллий манбаларга кўра, БМТнинг олти ходими, жумладан, бир нафар болгариялик ва беш нафар яманлик номаълум жангарилар томонидан Абян провинциясида ўғирлаб кетилган», — дейилади агентлик хабарида.
БМТ вакиллари Абяндаги гуманитар вазиятни ўрганиш учун иш сафари билан провинцияда бўлган. Манбаларига кўра, жангарилар БМТ ходимларини автомашинада номаълум томонга олиб кетган.
Ямандаги БМТ гуманитар ёрдам координаторининг коммуникациялар бўйича катта маслаҳатчиси Рассел Гики ташкилот ходимлари ўз ишларини якунлаб, Адан шаҳрига кетаётганда ўғирлаб кетилганини айтди, деб ёзади Sinxua.
«Бирлашган Миллатлар Ташкилоти уларнинг (БМТ ходимлари) озод этилишини таъминлаш учун расмийлар билан яқин алоқада», — деган Гики.
Ҳозирча ҳеч қайси қуролли гуруҳ ушбу ўғирлик учун жавобгарликни ўз зиммасига олмаган.
YPA эслатишича, 2021 йили «Халқаро қутқарув қўмитаси» (International Rescue Committee) нодавлат ташкилоти Яманнинг Абян провинциясида ташкилотнинг икки машинаси номаълум жангарилар томонидан талон-тарож қилинганидан сўнг ҳудудда гуманитар фаолиятини тўхтатганини эълон қилганди.
Аввалроқ Конгода ҳарбий трибунал 2017 йилнинг март ойида БМТнинг икки ходимини ўлдирганликда айбланган 51 кишини ўлимга ҳукм қилганди. 2017 йилда БМТ экспертлари — Швеция фуқароси Зайда Каталан ва АҚШ фуқароси Майкл Шарп хизмат фаолияти вақтида бедарак йўқолган. Икки ҳафта ўтгач, уларнинг жасади топилган.
Изоҳ (0)